之前聽人講過斐濟有一間全球最想去的酒吧,叫 Cloud9 !我當堂嚇一跳,然後得啖笑!大佬,有冇咁誇張啊!網上圖片可以呃人,執下相爛地都可以變天堂啦!眼見先為實,港女早前去了斐濟旅行,就把Cloud9放入行程之中。由碼頭上船,到踏上酒吧的這一刻,這裡絕對是我見過最靚的海景之一。難怪連酒吧侍應都好自豪咁話:「見過很多對情侶求婚,準新娘點頭率百分百!」

採訪:[email protected]港女講旅行 攝影:Woody、[email protected]港女講旅行

斐濟水上飄

先簡單講講斐濟這個地方,位置就是瓦努阿圖對落,出名水清沙幼,拍得住馬爾代夫。因為斐濟鄰近澳洲,所以一向是澳紐人的度假天堂。我所講的 Cloud9是全球唯一一間兩層高浮台酒吧,位處當地馬馬努卡群島(Mamanuca Islands)附近,蔚藍的大海中心。開業3年,更被喻為世上最想去的酒吧之一!

先到先得!海景搶手sunbed

不過唔經辛苦,又怎會見到靚景!朝早8時由Nadi市內的酒店車出發,再去到Port Denarau轉船。碼頭內有不同的船公司,經營不同的跳島一天遊,當然亦有Cloud9的接送服務。整個船程約40分鐘,以為沿途的海景已經夠靚,但遙遙見到四處無人,獨立浮在海中心的酒吧,感覺就更加夢幻。

一踏上浮台,先被侍應以熱情的「Bula!Bula!」(斐濟語:你好)歡迎,第一層是調酒台、料理枱、洗手間和約20張的sunbeds。因為我們是第一批客人,sunbeds先到先得,浮台邊正對大海的最受歡迎,當然要搶先影番張靚相。走上第二層,可以眺望一大片海,景觀更好。

跳入無盡玻璃水

這個千金難買的海景,睇足一日只要FJD200/HK$756(已包船接送來往碼頭、FJD50/HK$189餐飲),不設時限被無盡的玻璃水所包圍。難得的是附近的水域清澈見底,水深約7、8米,海浪不大,隨時在後上租用浮潛用具,就可以跳落水!(其他外國人水性好,連面鏡、呼吸管都唔需要。)不過浮潛見不到很多魚,游個水更開心!

上水之後叫杯酒,再試試他們即製的pizza!完全冇諗過,在海中心都可以食到意大利傳統柴燒的pizza,皮薄又脆,仲有少少柴香味;如果喜歡刺激的水上活動,更可以事前跟酒吧預約,另外加錢安排水上電單車、waterski玩!眼見其他遊客都會留足一日,但因為我來到之前並冇想像會咁靚,所以下午早已經安排其他行程,諗起都覺得蝕!

 

 

Cloud9
地址:Ro Ro Reef off Malolo Island, Fiji Islands
電話:+679(0) 869-7947
價錢:FJD200/HK$759(費用已包快艇接送及FJD60/HK$228餐飲)
營業時間:10:00am-5:00pm
前往方法:由Nadi機場乘20分鐘車程至Port Denarau,轉乘45分鐘快艇即達
網址:cloud9.com.fj