老老實實,我係一個有飛行恐懼症嘅人,我真係好 L 驚搭飛機!所以我好羨慕可以一上機就瞓到落機嘅人,例如我女朋友……

驚搭飛機女友難明 飛行恐懼症難睡着


人生充滿矛盾,我好鍾意去旅行,但又好驚搭飛機。而最令我感到痛心嘅係,女朋友完全唔理解我……

「放心啦,今次搭十幾個鐘,你一定瞓得着嘅!」女朋友咁講。

無論我去台灣、日本、定係韓國……我全程飛機都會處於一個精神緊張嘅狀態。有一次我同佢去意大利旅行,要坐成十幾個鐘飛機。佢以為我咁長時間,一定會瞓得着。

女友極速瞓着 食飽睇悶戲全無睡意

但我只能夠講,佢實在太唔了解有飛行恐懼症嘅人!

無論係去程定係回程,我一秒鐘都冇瞓過。由飛機起飛嗰一刻開始,我特登揀咗套睇落好悶嘅文藝電影,加上飛機餐好快就送到嚟,希望食飽又有套悶戲可以令我瞓得着。

坐我旁邊嘅女朋友,一食完飛機餐就好似食完安眠藥咁進入昏睡狀態。相反,鬼打都冇咁精神嘅我,就有種被背叛嘅感覺。

一套戲睇完……睇第二套戲……第三套戲……我都完全冇睡意。

飛機遇氣流受驚 手心出汗、全身難動

途中飛機遇上氣流,我就會嚇到全身僵硬,心跳加速,我完全集中唔到睇戲,除低個耳筒四圍望。

但係,其他乘客包括我身邊嘅女朋友,就好似乜事都冇發生過一樣,繼續瞓、繼續睇書或者睇戲。

呢個時候,我真係好想大大聲問佢哋:「你哋傻㗎?架飛機震到咁,你哋冇感覺咩?好恐怖啊!你哋知唔知啊?」

嗰程飛機一共遇到7次氣流,每次我都嚇到手心冒汗,但冇一次女朋友係會醒。直到最後我都冇瞓過,好多人落機精神爽利,而我一落機就好似去完打仗咁,心力交瘁。

科學數據無助克服「未知」的恐懼

「唉唷~你驚嚟都冇用㗎啦!就算有意外發生,你都改變唔到啲乜。」

「一生中死於飛機失事概率係兩萬分之一,而死於交通事故概率為一百分之一。」

好多朋友都咁樣同我講,又用科學數據嚟說服我。我都好理解自己唔識揸飛機,有意外更加冇能力令架飛機回復正常。但我真係好驚處於一個「未知」狀態下遇到意外。

我唔驚坐過山車,但搭飛機嗰種密封空間嘅離心力真係頂唔順。最近因為工作關係,要自己一個人搭飛機,我真係好想攬住空姐同佢講我好驚……

不過諗深一層,返到屋企被女朋友知道嘅話,後果一定恐怖過搭飛機……所以我最後都冇咁做。

希望大家都可以分享一下有咩解決辦法,或者有志同道合,一樣驚搭飛機嘅同伴,可以講下自己經歷。

下一頁:記唔記得同女朋友第一次旅行係咩感覺?

延伸閱讀: 想坐得舒服就唔好坐 廉航 啦!