Viu TV話題旅遊節目《跟住矛盾去旅行》將於4月4日首播,打頭陣嘅就係長毛同曾鈺成呢對矛盾組合。電視台為佢地安排咗去革命國家波蘭過聖誕,成個trip為期一個禮拜,佢哋去咗波蘭3個城市,分別係華沙、羅茲同格但斯克。最近網上瘋傳網民創作長毛同主席嘅愛情故事,唔知兩人去旅行又有冇擦出火花呢?

hk_viutv_program11


今次波蘭拍攝,除了ViuTV的製作團隊外,仲有香港唯一波蘭旅遊書《跟著波蘭人旅行》 的作者,波蘭人妻Sheila同行,以下採訪,就係來自這位有份參與行程設計和拍攝安排的波蘭達人!(網站:www.facebook.com/PolandTravelWithLocals )

Q1)  波蘭人對長毛同曾主席有咩印象?

viu_tv_travel1

A:”一般市民都幾留意長毛,因為佢衫上面印有哲古華拉,而歐洲人對哲古華拉嘅印象其實係麻麻哋,因為Che Guevara對歐洲人而言就是代表暴力,所以佢哋見到長毛件衫都會眼望望,提高戒備,談論下;至於主席就冇惹嚟注目,可能因為外形冇長毛咁突出吧(笑)。”

Q2)  兩人旅程中,有冇爭拗?

viu_tv_travel3

A:”佢哋係和平共處嘅,同埋都有交流溝通,不過如果講起政治就會針鋒相對;講得最多的口頭禪,就係一句『嘥時間』;通常拗到無結果時,二人都會用一句『嘥時間』去作結。”

Q3)  節目中,有冇任務要兩人合力完成?

viu_tv_travel

A:”有兩項慈善活動係要佢哋一齊完成。其一係波蘭好出名嘅Noble Box活動,要佢哋於聖誕前夕去探訪貧困家庭,並送上該貧困家庭最需要的東西,佢哋一齊探訪咗兩個家庭;另一個活動就要求佢哋於平安夜加入當地義工,參與一個志願團體舉辦予露宿者及貧困家庭的宴會Wigilia,二人要幫手招待大家,幫手分菜、傳菜等工作,相比起當地到場影張相就走嘅政客,二人真係落手落腳參與,非常有心。”

Q4)  兩人同當地人溝唔溝通到?

viu_tv_travel4

A:”試過叫佢哋喺當地餐廳用波蘭文點菜,主席能力就高少少,好快就學識之後成功點菜,長毛就差少少喇,不過當地人大部分都識英文,一聽到佢哋唔鹹唔淡嘅口音都會用返英文應對。另外,佢哋去家訪嘅時候都有一part係要佢哋唱波蘭文《Silent Night》畀嗰家人聽,長毛好快就放棄咗,主席就好落力學,最後畀歌詞佢哋揸住唱,兩人都成功唱到。”

Q5)  旅程中有冇趣事發生?viu_tv_travel9

A:”有,佢兩個都有個口頭禪:「嘥時間」。有時佢哋會互相話對方嘥時間,拍拍下嘢又話「嘥時間」,到旅程最尾幾日,我哋全部人都會攞「嘥時間」嚟講笑。”

Q6)  佢哋有冇助手跟埋去?

viu_tv_travel10

A:”兩個都冇帶助手去,不過主席就有帶埋曾太一齊嚟,拍嘢時曾太會企喺側邊望住,拍完佢哋仲stay behind去埋其他城市玩!”

Q7)  主席有冇啲不為人知嘅旅遊習慣?

viu_tv_travel4

A:”主席比較早瞓,食完飯10點幾就要返去休息,我哋叫佢一齊飲酒,但佢都唔會去,因為要返去寫專欄同寫blog。”

Q8) 其實拍攝期間,長毛是否長期醉酒?

viu_tv_travel5

A:”咁又冇,不過佢係好鍾意飲酒,做完嘢我哋都會去飲酒,大家傾下計,佢話好enjoy工餘時間去飲酒,覺得可以領略到當地文化。”

Q9)  二人是否第一次去波蘭?去完有咩感受?

viu_tv_travel13

A:”長毛之前去過一次波蘭,其實佢對華沙都有啲認識,甚至自己都認得路夜晚會四圍行,佢話幾鍾意波蘭,有機會都想再去;曾主席就第一次去,佢同太太stay behind時去咗克拉科夫,參觀咗鹽礦同集中營,拍攝完結後,我哋同佢傾返偈,佢都話覺得波蘭好靚,值得旅遊。”

圖片來源: ViuTV