對於遊客嚟講,香港係個一年四季都適合嚟度假嘅旅遊勝地。不過幸好,香港冇水上樂園……如果唔係我就大鑊了!

熱愛水上樂園 無意中抓傷男友


因為女朋友唔識游水,又接受唔到太刺激嘅機動遊戲,但佢係一個水上樂園愛好者。除咗大陸嘅長隆水上樂園,去峇里同澳洲黃金海岸,女朋友都會嚷着一定要去水上樂園。

陪佢玩當然唔係問題,我自己都好鍾意玩,但唔該可唔可以剪咗指甲先去啊?我每次都被佢抓到全身傷痕,被其他人側目取笑,幾醜怪。

「被」挑戰刺激滑梯 聽感想當玩咗

就好似嗰次澳洲黃金海岸水上樂園Wet ‘n’ Wild真係經典。Wet ‘n’ Wild 有好多款唔同滑梯,刺激程度各有不同,更有個能夠帶俾你「跳樓」感覺嘅垂直滑梯。

不過呢類只能夠單人玩嘅,女朋友只會叫我去玩,然後從遠處旁觀,再聽番我描述當時有咩感覺,就當自己玩咗。

圖片:Wet’n’Wild Gold Coast

U 形滑梯 再三確定要挑戰

樂園有部分嘅滑梯容納到雙人坐喺水泡上面,其中有個U字形滑梯,離心力驚人,仲有好似玩海盜船咁來回幾次,悲劇正正就係咁樣發生……

「你真係確定要玩?」我排隊時重複問過女朋友幾次。
「睇落都唔太驚,我冇問題嘅~」女朋友自信滿滿。
「但佢睇落好大離心力,你真係OK?」
「絕對冇問題,我出晒名大膽!」

由開心變面青 伸手亂抓「敏感部位」

排咗一陣終於輪到我哋,我同女朋友面對面坐喺水泡上面,水泡拐過幾個彎,速度愈來愈快,女朋友臉色開始發青,臉上笑容亦都消失得無影無蹤。

結果……

就喺水泡滑到U字形滑梯時,女朋友驚嚇過度,伸手亂抓,我胸口一痛!

直到玩完成個滑梯之後,行過嚟收水泡嘅工作人員對住我講「Wow~Nice~」,再指一指我胸口。

我低頭一望,有個血紅色嘅交叉,cross住我左邊乳頭……

有個血紅色嘅交叉,cross住我左邊乳頭,「男人最痛算這種……」

捉不緊水泡 交叉傷痕愈來愈明顯

「哈哈……哈哈哈……」女朋友望到即刻指住我嚟笑。
「你仲笑,係你搞成我咁!」
「我頭先太緊張,捉唔實個水泡嘛,唔緊要啦,呢啲小傷口應該冇疤痕嘅~」女朋友表示。

「小傷口?最弊個小傷口喺正我個小乳頭上面呢!」
「放心啦,唔覺眼嘅。」

我起初都係咁安慰自己,咁淺色應該冇咩人睇到嘅。
不過,我留意到周圍嘅遊客都望住我笑,我先知道……胸口傷痕愈來愈紅,根本就非常顯眼……

「我哋去玩啲冇咁刺激嘅好冇?」女朋友表示。
「點解係你倒番轉頭講呢句?」我話。

我數唔清全日有幾多人注視住我乳頭上嘅交叉,但女朋友就玩得相當滿足,同一條滑梯玩咗超過四次……

外國樂園有個優勝之處,就係唔會太多人排隊,唔會烈日當空慢火煎乾個身,到玩滑梯時又濕番,然後再慢慢煎乾。

最後總結全日行程係開心嘅!不過大家記得,如果帶女朋友去水上樂園,一定要監管住佢剪指甲!