Calling!Calling!想去日本睇紅葉的朋友仔要留意,身邊不少人為咗影靚相都盡心打扮,著新衫又玩襯色。可惜事與願違, 紅葉相唔靚不特止,仲著唔夠衫,最後傷風感冒!今次為大家睇睇大眾賞紅葉穿搭5大謬誤,睇完就唔怕影唔到靚相啦!

01 | 賞紅葉穿搭一定要著夠衫 因為好L凍啊!


賞紅葉最大謬誤,就係以為天氣唔會好凍,所以著唔夠衫,最終一係堅持少布最後感冒,一係著住老套羽絨影,又唔會有靚相呢!其實去年東京已在11月迎來54年最早初雪,所以天氣極凍,暖包記得一定要長期跟身!所以出發前,襯衫就一定要連厚褸一齊襯,又或者學習洋蔥式穿搭法,Heat-Tech + Fleece + 大褸,影相時把握黃金5分鐘,除厚褸換靚靚外套即影,咁就唔怕凍親又有靚相啦!

紅葉穿搭
前排去日本東北影紅葉,model著得勁薄,影咗唔夠5分鐘就話凍!

02 | 玩大地色系絕對會出事!

不少人(尤其文青)襯衫都愛玩monotone,如果想影紅葉,就千祈唔好玩大地色系或紅色系的monotone,事關影相時會融入景色,毫無焦點!其實影紅葉,紅楓樹海背景已經好密集,所以身上的打扮一定要能突出自己,咁先可以搶鏡唔淪為配角。建議冷色系或黑白灰都是唔錯的選擇!

紅葉穿搭
藍色勁顯眼,一定唔怕融入紅葉中!

03 | 樹下泥濘雪地 新鞋註定會污糟

去旅行,好多人買新鞋都會即刻著,但如果你準備去睇紅葉,就建議你等多兩日啦!事關紅葉樹下9成是泥地,記者試過陪model影15分鐘已經滿腳污泥,睇到對鞋都覺得傷心!尤其落雪過後,泥地變成泥濘雪地實在好難搞,所以絕對唔好挑戰著白鞋、新鞋、高踭鞋等等,反而防跣腳的山系boots先係首選!

好多人包括model都愛著白色鞋,但一踩上泥地咪話唔心痛,其實可考慮著山系boots!
好多人包括model都愛著白色鞋,但一踩上泥地咪話唔心痛,其實可考慮著山系boots!

04 | 必備帽、耳環、頭飾等小配件

除咗影意境文青照,影大頭照亦是必須的吧!如果不是黑髮,就緊記要戴齊帽、耳環、頭飾等小配件,因為可以令相片構圖更豐富,影景深效果時會更出眾,model曾經冇戴任何飾物上陣,即變超圓大面,so sad!但記得唔好太貪心,飾物款式不宜太誇張,亦唔好太巨型,否則會搶fo,紅葉變配角就太可惜了!

紅葉穿搭
最簡單戴冷帽已經有效果!

05 | 和服?千祈唔好試!

每當遇上櫻花、紅葉、銀杏等景色,不少人都會聯想到要著住和服影。講真,影出嚟真係靚,但過程一定令你好難忘!記者試過帶model著和服影,每時每刻都要擔心整污糟要賠錢,執紅葉又唔方便(千祈唔好摘樹上的葉,會被人鬧),最後model都頂唔順話:「一次就夠!」所以,如果你有超強忍耐力,當然要試試;但容易嬲嬲豬的話,就千祈唔好試喇!黑住面影相又點會好睇呢?

紅葉穿搭
和服行石路都仲忍到,行泥路真係好辛苦!

延伸閱讀:性價比極高!$1,300入住大阪天然溫泉酒店

又到秋天|賞紅葉穿搭 襯衫5大謬誤