每次身邊朋友做空少空姐,相信就會有一大堆問題衝口而出。「你買機票有冇折啊?」、「幫我帶啲手信返嚟啊!」,究竟空服員們內心點樣諗?其實空少空姐唔係唔想答你,係誠實答你怕傷感情啊……今次GOtrip編輯部就邀請到業餘空少飛Sun講出空服員覺得最難頂的6大問題。即刻看看到底係點解!

text: 業餘空少飛Sun | photo: 新傳媒集團

空少空姐話你知!空服員覺得最難頂的6大問題

1. 「你幫我買機票會唔會有折呀?」

唔會呀!冇錯,係有超平價員工飛,但唔係立亂可以幫人出飛呀!只限直系親屬、配偶、配偶嘅父母,如果未婚同事可以有一個指定嘅旅伴quota,呢個quota通常都會畀咗男友/女友或者閨蜜等等,總之就唔係你隨便問下就畀到折你囉~

做空少你問我答|身邊最多人問 6大關於空服員疑問 空少親自解話!
不過咁,呢啲員工飛(俗稱乞兒飛)都唔係你想像中咁著數嘅。

要班機有吉位先可以放啲位出嚟,仲要論資排輩。基本上旺季班班機爆滿都唔使諗會上到機。而且一日飛機未閂門,都一日唔可以確保個位係你嘅。曾經聽過有同事上咗機,櫈都未坐暖就被地勤同事收番個位,去旅行要去到咁提心吊膽,其實專心撲平飛仲好啦!

做空少你問我答|身邊最多人問 6大關於空服員疑問 空少親自解話!
要使用空服人員福利都不容易啊!

2. 「你會唔會飛開邊度,可唔可以……」

唔可以!唔可以!唔可以!因為好重要,所以要講三次!我哋係做空服員,唔係做代購呀baby!
雖然你可能覺得我哋去到外國,幫手買少少嘢再帶返嚟都係好順便,舉手之勞嚟嘅啫!但好多時其實做完班機後,我哋都未必夠時間唞夠又要再飛喇!真係冇你哋諗得咁順便呀!依家網上世界各地咩都買到返嚟咁方便,放過我哋啦…… 咁若果同事們主動問你又另計啦!

做空少你問我答|身邊最多人問 6大關於空服員疑問 空少親自解話!
身邊總有個,知道你做空服員,想找你代購的人。

3 「你仲飛緊呀!空姐空少唔係最多做幾年就要退休/轉落地嘅咩?」

好多人以為我哋份工一定係年輕貌美先做得,但其實我哋行業入面好多資深空姐空少都飛咗二、三十年喇!可能因為好多同事都心境年輕又保養得宜啦!
係呀,touchwood一直冇穿冇爛的話,我哋可以飛到五十五歲至退休。仲有好多人都唔知其實我哋份工係可以升職,雖然正常所需時間長達十年以上,但我諗住做到變空中老爺呀!

做空少你問我答|身邊最多人問 6大關於空服員疑問 空少親自解話!
資深空姐的年資,都有成二、三十年。

4.「你識唔識阿某某? 佢都係做你間公司呀!」

一間航空公司有咁多個空姐空少,有啲公司可以有成萬個咁多,你以為我喺工作上咁容易識到你哋嘅另一個朋友嗎?少年你真係太年輕喇!

之前有班機個阿姐話飛咗12年,都未見過同機的客艙經理。大家係同一間公司同一部門同一team做咗12年都從未見過對方。冇錯,係12年!即係十二生肖都循環咗一圈啦!但係上天始終都冇安排呢兩個同事喺12年內相遇。當然,即使唔相遇,都有可能聽過A某某的尊姓大名。

做空少你問我答|身邊最多人問 6大關於空服員疑問 空少親自解話!
好不容易能夠在同一班機工作。

一個人出名,不外乎兩種原因。一係揚名立萬,一係就臭名遠播,如果你同阿某某真係朋友的話,我估你未必想我詳細解釋點解我會聽過佢個大名喇!
做空少你問我答|身邊最多人問 6大關於空服員疑問 空少親自解話!

5. 「點解啲飛機餐咁難食嘅?」

冤枉啊包大人!啲飛機餐唔係我哋煮呀!個餐單唔係我哋訂呀!啲食材唔係我哋預備呀!隻牛唔係我哋養呀!粒番茄都唔係我哋種呀……
不過咁,之前睇過有啲研究話喺飛機上面嘅雜音會混淆人類嘅五味,低壓環境亦會削弱人嘅味覺,所以建議可以戴住耳機食飛機餐,會好味啲,不如你下次試一試啦!

做空少你問我答|身邊最多人問 6大關於空服員疑問 空少親自解話!
你下次試一試,戴住耳機食飛機餐。

6. 「幾時介紹啲空姐畀我識呀?」

阿媽教落唔好做雞仔媒人,介紹人呢瓣我唔在行㗎!不如我都係介紹番你自己上 Instagram 度 follow 各大人氣空姐女神啦!

家下科技咁方便,大大拉近咗人與人之間嘅距離呀!你想同佢哋傾偈,大可以試下私訊畀佢哋,唔使要中間人咁麻煩啦係咪?

做空少你問我答|身邊最多人問 6大關於空服員疑問 空少親自解話!
介紹人呢瓣我唔在行㗎!