相比起我哋呢一輩,好多人每年至少去一次旅行,有人慢慢咁實現環遊世界嘅願望,有人當作去日本韓國係返鄉下咁,吃喝玩樂輕鬆番幾日。但我哋嘅父母就冇咁好彩,年輕時冇咁多機會去旅行,科技未咁發達,去旅行唔係咁容易,經濟上亦未必負擔得起。所以,好多子女都會帶父母去旅行,想一家人留番個美好回憶。不過,帶父母去旅行,往往都只會留下不愉快嘅經歷。

父母去旅行性情大變 超難服侍!


唔知點解,父母去到另一個國家,就會性情大變,變到成個港童咁,難服侍嘅程度直線上升,要滿足佢哋仲慘過服侍皇帝。

以下係綜合朋友,令人哭笑不得嘅父母旅遊經歷:

不少父母見到年輕人自由行周圍去,都會想跟著一起去!(圖片來源:《4個小生去旅行》劇照)

01 | 食物唔啱口味

去旅行其中一大樂趣就係嘗試當地美食,雖然有啲未必啱自己口味,但去到外國旅行,唔通仲餐餐食中菜咩?!

食貴嘢前同爸媽講定一聲,唔係就會不停嫌貴。

但父母就唔係咁諗,行街行到肚餓就會扭計,難得去到旅行,想食間網上介紹嘅餐廳,行太遠再扭計,要等位再扭!結果原來唔啱口味,就會講一句:「行咁遠就係帶我嚟食呢啲嘢?」

見到呢條長龍,應該即刻擰晒頭。

02 | 個天入黑就眼瞓

去旅行最重要就係識得利用晒全日嘅時間去玩,呢個亦係plan行程嘅重點。

但父母一樣唔會領情,個天開始黑,佢哋已經嚷著想瞓覺。最好即刻有架的士送佢哋返酒店瞓覺。當年輕人計算點樣玩盡成個旅程,父母只會關心佢哋嘅睡眠質素。

男神彭于晏曾帶著70歲的媽媽去日本奈良。

03 | 香港都有啦 使乜去旅行

相信好多人都會覺得,去旅行嘅原因只係想暫時離開壓力大到爆炸嘅香港,身處一個陌生嘅國家,hea足幾日都開心。

但父母個心態係,佢哋覺得留喺香港係最好,要搭飛機去另一個國家已經要扣分,仲要做啲香港一樣做到嘅嘢,咁點解要大費周章離開香港?

圖片來源:林依晨微博

對於好多父母,家庭就係佢哋嘅世界

以上所講嘅唔代表100%父母都係咁,有啲父母比起子女更喜歡去旅行,每個月攞住個仔畀嘅家用自己規劃旅行,而子女每個月就做到嘔血。

另一方面,點解父母嘅思想總係咁奇怪,覺得萬事只有屋企好?好多人去旅行係想探討呢個世界,但對於好多父母嚟講,家庭就係佢哋嘅世界。

好多人去旅行係想探討呢個世界,但對於好多父母嚟講,家庭就係佢哋嘅世界。 | 圖片來源:《愛。回家之開心速遞 》劇照