香港摩天輪終於開幕啦!呢個坐落中環九號碼頭旁,高60米的香港摩天輪對正維港,車廂四面都設有大型落地玻璃,天氣好的話仲可以一次過睇哂維港兩岸景色。雖然有網民反映摩天輪門票偏貴,但小記試搭之後覺得物有所值,即刻同大家分享六大激讚Points!

1. 載客量
摩天輪設有42個車廂,每個車廂都可以坐到8個人,就算遇上大時大節人流增多,排隊都唔使好耐。加上當日見到安排上落車廂的工作人員都非常快手,人流管理做得好,大家想叫多幾個朋友一齊睇靚景都無問題。2. 睇維港靚景
由於摩天輪面向維港一面無遮無擋,所以可以睇盡維港兩岸靚景,如果黃昏乘搭可以欣賞日落景緻,而夜晚更會睇到維港兩岸璀璨的燈飾,非常浪漫。

3. 恆溫車廂
摩天輪的車廂有恆溫設備,就算當日室外氣溫只得15度,但一入到車廂就即刻變到暖笠笠。最厲害是外面刮風的時候,車廂居然連少少風聲都無,又靜又舒服,如果得自己友搭,播埋音樂就更有feel。4. 車廂夠穩定
坐摩天輪最怕左搖右搖,好在今次搭香港摩天輪夠哂穩定,就算升到最高點時,摩天輪仍然非常平穩,無論車廂入面有人移位影相,或者出面有風都影響唔到摩天輪運作。

5. 慢慢影靚景
摩天輪每次乘搭時間為15至20分鐘,加上中間仲會停低上落客,俾足時間大家慢慢欣賞維港靚景同影相。不過車廂採用灰藍色玻璃,唔想相片顏色受影響,就記得調整相機設定啦!6. 尊貴體驗
42卡車廂裡面隱藏咗一個VIP車廂,除了使用更高級的皮椅之外,車廂底仲會轉做透明玻璃,係半空望返落地都咪話唔腳仔軟,自問膽識過人不妨試下挑戰!

摩天輪開放時間為早上11點到夜晚11點,門票收費大人$100,殘疾人士、12歲以下小童、學生同老人$70。