相信搭過飛機嘅人都見過,喺飛機即將降落之前,空服員係會攞住個大托盤,幫 乘客 收番啲用完嘅膠杯、餐具、餐紙等等,除咗係想 乘客 們坐得舒服啲乾淨啲之外,其實係同安全問題有關。

收膠杯、餐具等,主要係想 乘客 可以收好枱面,因為飛機起飛同降落係屬於比較容易發生意外嘅階段,所以航空公司規定所有旅客起飛降落時必須收好枱面,萬一有意外發生都可以盡快逃生。但好多乘客見有人收嘢,就咩都「隊」晒畀空服員…… 包括明明已經收埋喺seat pocket/櫈底嘅垃圾…… 其實我個托盤根本唔夠位收晒成條走廊嘅垃圾㗎!一齊睇下空姐最怕收到啲咩啦~

不要給我!第一位:用過的針筒

1L-針箱

其實飛機耐唔耐都會有啲需要使用針筒嘅乘客,佢哋大部分都因為長期患病,所以需要隨身攜帶針筒,方便注射藥物。其實針筒呢樣嘢可大可小,用過嘅針筒上面有無數病毒,一個唔小心被拮到,就有可能染上疾病,係好危險、好嚴重嘅事。試過有同事差啲被針筒拮到…… 就係因為乘客就咁遞畀空姐…… 真係諗起都怕怕。

提提各位,其實飛機係有sharp box (下圖) 供應畀需要丟棄針筒嘅乘客~ 為人為己,請小心處理針筒,多謝合作。

不要給我!第二位:BB屎片

2C6DD2B600000578-0-image-m-14_1442564595689

個人經驗嚟講,屎片真係最經典嘅~ 有人畀便便你喎!真係未做呢份工嗰時都冇諗過呀! 雖則話姥姥我日日都幫自己隻狗狗執屎,但係喺飛機度都真係唔想收屎片…… 555555 其實大大個廁所喺隔籬,入面係有垃圾桶嘅,況且呢樣嘢都唔符合衛生問題,空服員嗰頭處理完啲金黃葡萄球菌,呢頭就去派餐…… 你明唔明嘅啫?洗咗手都係咁話啦~

不要給我!第三位:雲吞紙巾

airplanecoldbhp2
圖片來源:www.independenttraveler.com

有時收到雲吞,真係覺得自己猶如一個人肉垃圾桶…… 即係你一睇,就知係包住鼻水鼻涕痰嗰啲…… 我發現無論係我攞住托盤好、冇攞住只有雙手也好,有啲乘客都係咁鍾意請我食呢啲新鮮熱辣嘅雲吞。 有啲同事會因為怕麻煩,又或者唔夠時間,會一手接咗,但其實咁樣係極度唔衛生,而且非常容易傳播病毒。麻煩閣下可以掉去廁所嘅垃圾桶呀~

其實好簡單,空服員就係處理閣下餐飲服務嘅人…… 你想佢雙手掂過啲咩? 希望大家下次畀垃圾空姐嗰時停一停,諗一諗!我哋會好感激大家嘅體諒㗎!❤


Btw,感謝讀者支持,我個 page 開咗唔夠三個月已衝破 4,000 likes…… 要繼續支持我啊!❤

fb: 兼職空姐姥姥

https://www.facebook.com/parttimelolo/


下一頁:飛機冷知識 | 飛機上最Dirty的地方,竟然不是洗手間?

延伸閱讀:

空姐發火,非同小可 | 力數 8 大令人側目的 乘客行為

空姐 唔易做 | 一人分飾多角唔簡單