1月開始,香港都仲係時凍時暖搞到唔知著咩衫好,但係日本嘅東北同埋北海道地區其實已經開始進入飄雪嘅季節啦~係銀白色嘅浪漫又凍到你傻嘅環境下,浸一個露天風呂(露天溫泉)絕對係嚴冬嘅不二之選。睇定今次呢10個一邊睇漫天飛雪嘅「雪見」溫泉介紹,plan定冬季去感受人生最奢華啦!

其他地區:【東北地區】【關東地區】【日本中部】【關西地區

東北地區
1)  白布溫泉 東屋【山形縣】

位於山形縣米澤市嘅白布溫泉已經係由1312年就開湯,非常有歷史性嘅溫泉。曾經喺江戶時代被喻為歐洲三高湯之一,受好多人愛戴同人氣嘅露天溫泉嚟架!

浸泡喺比自己高幾倍嘅積雪當中一邊感受雪景,相信係普通只係熱暈你嘅露天溫泉所感受唔到嘅滋味。真係每分每秒都感受到雪雪雪呀~

詳細資料:

【地址】山形県米沢市大字関1537
【網頁】http://www.shirabu-higashiya.com/
【價錢】一泊二食14,730円起(一人)

2) 乳頭溫泉 鶴の湯【秋田縣】

根據日本溫泉百選RANKING中,位於秋田縣嘅乳頭溫泉相當有名氣,因為乳頭溫泉鄉鶴之湯的確係秘湯之一。秘湯喺日文嘅意思即係遠離人煙、隱秘嘅溫泉。好多秘湯都係由古舊嘅旅館一直經營至今,堅持保存住日本嘅傳統風味架!

呢間溫泉旅館咁出名除左佢嘅秘湯之外,仲有乳頭溫泉之中最有豐富歷史嘅「本陣」館,因為佢以親民嘅價錢去享受地道嘅囲炉裏(地爐)料理同房間,絕對值得一去!不過聽講訂房好似半年前就好快FULL晒同只能透過電話預約,可想而知有幾受歡迎!

而係鶴之湯之中共分左4個溫泉分別係白湯、黒湯、中之湯、瀧之湯,雖然望落去好似差唔多樣,但佢地個個都有唔同嘅醫療功效架,難得入到隱世秘湯梗係要浸返夠本啦!而且同白骨溫泉一樣佢都係有露天混浴溫泉,不過因為位於隱蔽所以唔會有外人會睇到,等你可以享受秘湯嘅魅力。就連日本人都話:去欣賞雪見溫泉,絕對係冬天嘅乳頭溫泉!

詳細資料:

【地址】秋田県仙北市田沢湖先達沢国有林50
【網頁】http://www.tsurunoyu.com/
【價錢】一泊二食9,870円起(一人)

 

關東地區:日本溫泉百選No.1 滑雪順便歎溫泉

日本中部:男女一齊浸 昇龍道混浴秘湯

關西地區:去奈良玩完鹿仔浸溫泉

其他地區:【東北地區】【關東地區】【日本中部】【關西地區

關東區

3) 草津溫泉 つつじ亭【群馬縣】

講到草津溫泉你真係唔可以唔知!貴為日本三大名湯之一嘅草津溫泉,已經連續10幾年被選為日本溫泉百選第一名!而喺呢個咁出名嘅溫泉鄉入面,呢間つつじ亭亦都係嚴選嘅源泉溫泉,即係直接從源泉頭直接抽取,無添加嘅天然溫泉。而且つつじ亭成間旅館有5分之3都係被自己林木所包圍,100%大自然感覺~

其中館內嘅露天溫泉喺冬天就會被白雪包圍,喺呢個環境下感受日本No.1溫泉真係無得彈架!

詳細資料:

【地址】群馬県吾妻郡草津町639-1
【網頁】http://www.tsutsujitei.co.jp/
【價錢】一泊二食25,000円起(一人)

4) 万座溫泉 万座高原ホテル【群馬縣】

万座溫泉位於群馬縣海拔1800幾米嘅嬬恋村之中,有「距離星空最近的溫泉」嘅美喻,所以露天溫泉嘅景致絕對出類拔萃!

而呢間万座高原酒店流去地面嘅共有8款溫泉,名為「石庭露天風呂」,聽落都覺得充滿詩心情畫意。泉水更分別有27種醫療效能,所以係雪見露天溫泉TOP RANKING嘅常客。想睇滿天星星又想睇雪景,Why not both?

詳細資料:

【地址】群馬県吾妻郡嬬恋村万座温泉
【網頁】http://www.princehotels.co.jp/manza-kogen/
【價錢】一泊二食9,200円起(一人)

日本中部:男女一齊浸 昇龍道混浴秘湯

關西地區:去奈良玩完鹿仔浸溫泉

其他地區:【東北地區】【關東地區】【日本中部】【關西地區

日本中部

5)  奥飛驒溫泉 湯本長座【岐阜縣】

係岐阜縣高山市最有名嘅奧飛驒溫泉鄉之中,最具代表嘅就係呢間秘湯「湯元長座」,佢係由古老嘅民家改裝而成,非常有傳統氣息!

湯元座長嘅私人露天溫泉(日文:貸切露天風呂)共有三個,其中一個一到冬天就會化成絕景雪見溫泉。唔止咁架,湯元座長可以係自己嘅房間享受地爐(日文:囲炉裏)料理同溫暖都係樂趣之一!

詳細資料:

【地址】岐阜県高山市奥飛騨温泉郷福地786
【網頁】http://www.cyouza.com/
【價錢】一泊二食18,000円起(一人)

6) 高山龍神溫泉 龍リゾート&スパ【岐阜縣】

當你一早張開雙眼,見到被茫茫白雪覆蓋嘅森林係咩感覺?一邊嘆住溫泉嘅你相信一定唔想起身。為於岐阜縣嘅高山龍神溫泉就有呢個雪見絕景~雖然佢可能唔算好出名,但佢擁有100%由地下1,300米嘅源泉直接抽取嘅泉水作溫泉,絕對天然新鮮!

你知道嗎?擁有pH8.5以上嘅溫泉水係屬於碱性溫泉,聽講對軟化同清除老化角積有顯著功效。而龍神溫泉更擁有pH9.1嘅碱值!真係要早午晚都浸足先夠呀!

詳細資料:

【地址】岐阜県高山市荘川町新渕892-11
【網頁】http://www.ryuresort.jp/
【價錢】一泊二食12,000円起(一人)

7)  白骨溫泉 泡の湯【長野縣】

由日本明治時代創業超過100年嘅白骨溫泉泡之湯係歷史悠久嘅老鋪。根據當天天氣氣候如何,就會有唔同嘅雪見享受架~

不過白骨溫泉當然唔止雪見咁簡單啦,呢度仲要女性都可以安心咁享受混浴溫泉而聞名架!混浴溫泉係日本其實並唔出奇,只係就算幾唔出奇都總會有羞恥心會怕羞架嘛!所以白骨溫泉為左一眾廣大女性著想,將進入混浴溫泉之前就有個女性專用嘅室內溫泉,一邊係溫泉裡面浸住行去出面個混浴溫泉!換言之你係唔會被異性見到你嘅身體架!再加上呢個混浴露天溫泉嘅泉水係乳白色,咁貼心嘅溫泉邊度搵?

詳細資料:

【地址】長野県松本市安曇4181
【網頁】http://www.awanoyu-ryokan.com/
【價錢】一泊二食17,280円起(一人)

 

8) 山中溫泉 吉祥やまなか【石川縣】

其實石川縣嘅加賀市,實際上係由「山代」、「粟津」、「山中」同「片山津」呢四個溫泉所構成,而其中最有人氣就係山中溫泉。日本文學俳句詩人松尾芭蕉亦都稱讚過呢度係日本三大名溫泉之一架!(日本三大名泉雖然冇被正式認定,但普遍以「草津」、「下呂」、「有馬」為日本三大名泉。)

但能令詩人都樂而忘返嘅溫泉絕對有佢嘅原因。係冬季降雪量極其多嘅石川縣,能夠親自感受雪見溫泉所帶嚟嘅夢幻景致,不論係露天溫泉,定係私人溫泉甚至係足湯,都包保你唔捨得走!

詳細資料:

【地址】石川県加賀市山中温泉東町一丁目ホ14-3
【網頁】http://kissho-yamanaka.com/
【價錢】一泊二食11,000円起(一人)

關西地區:去奈良玩完鹿仔浸溫泉

其他地區:【東北地區】【關東地區】【日本中部】【關西地區】

9) 湯村溫泉 とみや【兵庫縣】

關西地方雖然積雪冇東北地方咁多,但嚴冬其間都會有機會欣賞到幻白色嘅世界架!好似呢間位於兵庫縣嘅湯村溫泉とみや,擁有獨有嘅雪見美景,更有8種不同功效同2種私人家族溫泉,等你靜靜獨佔呢個絕景~

好多人會問,其實細路仔適唔適合浸溫泉呢?答案:係得架!呢間係旅遊網站獲得嬰兒同孕婦都想住宿旅館No.1嘅とみや,擁有令嬰兒同孕婦都可以好好享受溫泉嘅設備。你要讓你嘅小孩子都同你感受到雪見溫泉嘅魅力嗎?

詳細資料:

【地址】兵庫県美方郡新温泉町湯181-2
【網頁】http://www.yumura-tomiya.com/
【價錢】一泊二食12,960円起(一人)

 

10) 吉野山溫泉 湯元 宝の湯【奈良縣】

以賞櫻聞名嘅世界遺產,位於奈良嘅吉野山其實亦唔止滿山櫻花架!每當冬天,吉野山景就會好似化左一個冬天嘅妝容一樣,同櫻花嘅絕景一樣令人讚嘆~

所以呢位地理位置優越嘅吉野山溫泉旅館,讓你無視線阻擋咁享受雪見溫泉。相信而家咁多平機票去關西大阪嘅你,順便嚟奈良吉野山感受雪景下嘅世界遺產都冇咩難度吧!