「小別勝新婚」呢句說話其實都幾真,當平時日日都見面,但突然間要暫別一段時間。或者呢種掛念,就正正係人哋所講嘅感覺。

對於曖昧中嘅男女,1日不見已經如隔生抽,尤其當對方要離開1星期,嗰種感覺似乎更加強烈!!

旅行前通話 出遊外地勿忘對方

記得當時中學生涯完結嘅時候,連公開試都考埋,真係開始「廢青生活」。可能有朋友仔就選擇返part-time賺錢,相反我就同老死一齊去畢業旅行。

而當時,我同1個女仔處於曖昧階段……

「我聽日去台灣啦~」

「係喎……咁快嘅……」

「係呀,你有冇嘢想買呀~~」

「Umm……我未諗到呀……到時再話你知haha,不過你去到嗰邊唔好唔記得我。」

「哈哈~點會呢~~」

「算你啦~早啲休息啦你,聽日早機呀~」

「好啦,我聽日起身再搵你啦!」

不過旅行實在太過吸引,通常有時講「點會呢~」,最後都係會……

2012-06-11 12.00.03

出外遊玩冇網絡 遲回短訊大忌

第1次去台灣實在太興奮,加上平時讀書考試都冇試過同班老死玩到咁癲,今次真係個好好嘅時機,玩完又食、食完又玩,我終於發覺原來呢啲先叫生活!!

不知不覺,已經玩到夜晚返酒店。

或者以前仲未普及Wi-Fi蛋、上網卡咁,所以好多時喺街度冇辦法睇到訊息,而我打開酒店Wi-Fi 嘅時候,已經收到好多個訊息……

全部,都係嚟自呢個女仔……

「到台灣未呀?」 上午11時

「哦……肯定掛住識女仔啦!」下午3時

「得啦得啦,玩得好開心啦,冇人啦~冇人啦~」晚上9時

2012-06-12 20.33.31

朋友玩到唔想走 卻知道有人在等着回去

今次大鑊了,快樂不知時日過,轉眼間已經玩咗1日,呢次真係忘了愛!!

「呀!!我啱啱先返到酒店咋……喺街度上唔到網……」

但只見到佢雙藍剔,贈我已讀不回……

#贈我一剔或許 #容易~

#唯獨我是那麼 #特殊~

今次的確衰自己,所以都不斷去氹番對方。或者曖昧中嘅男女都係咁,就算你做錯啲咩都唔會嬲你。

就算嬲,只要你氹對方幾句都會好快冇事:)

旅行期間,除咗同眼前一班老死一齊玩之外,好多時候都會同呢個傻妹一齊傳訊息,有時仲要傾到連身邊朋友都知道你哋打得火熱。

無疑,呢刻的確都好想快啲見到對方~好想對方喺自己身邊。
2012-06-12 09.28.10

歡樂時光總係過得特別快,1星期吃喝玩樂好快就完結。搭車去機場嘅時候,好多朋友個個都玩到唔捨得走,嗰種不捨真係全部畫晒喺塊面度……不過講真都係人之常情嘅。

但對於我嚟講,反而今次呢種感覺……冇咁強烈。

或者,係因為我知道有1個人等緊我:)1個,滿滿嘅思念。

PS:仲傻到…… 話想去機場接我,不過最後飛機delay,但佢都喺屋企等到凌晨~~或者呢個行為真係曖昧熱戀時候先會咁做:)

2012-06-17 02.28.45

Ig: hottofuzai

fb: 熱豆腐仔
熱豆腐仔一個人去旅行