旅行兩個字,聽落好開心,由執行李、計劃行程開始,至到行程完結,滿載而歸返到久違嘅屋企。我個人覺得最沉悶、最難忍受就係「搭飛機」呢個環節。

點解呢?出發時心急想去到目的地,回程時又心急想返屋企,但你知道坐飛機係唔急得,亦有好多限制。

搭飛機 3大苦況 總有一次會遇過!

可能你會話:「咁唔鍾意搭飛機!唔好去旅行囉!返深圳囉笨!」做人就係咁矛盾,正如冇人鍾意返工,但為咗每個月份薪水,為咗唔好浪費珍貴嘅假期,盡快到達目的地國家,搭飛機係無可避免嘅……

搭飛機嘅過程已經難受,但遇到某啲乘客難頂嘅行為,就苦上加苦。以下幾樣狀況唔知大家有冇試過呢?

01 | 將椅背校到最低瞓覺

有次要坐十幾個鐘頭飛機,坐前面位乘客非常幸福,由起飛冇幾耐就瞓到落機……不過最慘嘅係佢將椅背校到最低嚟瞓覺。佢當然舒服,坐佢後面嗰個就慘。想睇戲,個螢幕又睇唔清楚,食飛機餐又辛苦。

我嘗試過叫空姐可否幫幫忙,拉高少少畀我舒服少少。前面位乘客好貼心地畀咗30分鐘時間我食飯,然後又校到最低繼續瞓覺……

我再叫空姐幫忙,點知前面位乘客一句:「唔滿意咪坐商務或頭等囉!張椅容許我校到咁低,我就有權校到咁低啦!」

我無言反駁!雖然乘客的確有權利,但希望大家都可以有少少同理心,唔好影響到其他乘客。

希望大家都可以有少少同理心,唔好影響到其他乘客。

02 | 小朋友由上機喊到落機

呢個又係一個冇辦法解決嘅問題,小朋友搭飛機難免會喊。即使佢喊到拆晒天,你亦唔可以鬧佢……因為~佢係小朋友嘛!但同時又唔能夠禁止小朋友去旅行。所以,如果你搭嘅係長途機,又見到身邊有小朋友彈下彈下好開心咁上飛機,就真係要自求多福了。

不過有啲父母就以「小朋友要喊,我都冇辦法」呢道免死金牌,當身邊小朋友喊到滿臉淚水嘅時候,依然無動於衷,由得個小朋友喊,繼續瞓覺睇戲,而影響嘅就係全機乘客。

圖片來源:JetBlue

03 | 大媽唔用耳筒睇劇

搭飛機需要長時間坐喺一個窄小嘅空間,大家都會搵適合自己嘅娛樂去打發時間,煲劇係一個好好選擇。但唔用耳筒,要全機人一齊同你煲劇係咩玩法呢?

曾經遇過一位大媽喺飛機唔用耳筒煲大陸劇,如果大家有睇過大陸劇,應該知道嗰種鏗鏘有力、高音誇張嘅講對白聲,唔係人人受得了。空姐去叫呢位大媽用番耳筒,以免影響其他乘客,大媽嘅回答非常有趣,佢話:

「我沒帶耳筒,你們提供的耳筒夾到我的耳朵好痛!」幸好,經過空姐多番勸阻,大媽終於肯戴番「會整痛佢耳仔」嘅耳筒繼續煲劇。

圖片來源:St. Louis Post-Dispatch

乘客有權利去做好多事,但係咪一定要運用到盡呢?能夠搭到同一程飛機,都算係一種緣分。當飛機降落,相信唔會再遇到對方,喺呢段短短嘅相逢時間,希望大家都唔好做啲會影響其他人嘅事。