大部分香港人都鍾意去旅行,大家都想喺大到爆炸嘅生活壓力中解放。不過每當討論內容提及到「旅行」,總係會出現意見分歧。

去旅行都要分門派 到底邊種方法係最好?


我所指嘅分歧,唔係邊個國家最好玩,而係去旅行嘅方式!以我自己為例,我每次搭飛機都會頭痛,所以寧願畀貴少少都唔會搭廉航,務求可以舒服少少瞓一個好覺。

相反酒店可以好慳,只要地方衛生交通方便就足夠。當然一定有人唔認同,唔應該將啲錢浪費喺短短幾個鐘嘅飛機上面。所以,去旅行都要分門派,以下係三個最常見嘅派別。

01 | 窮遊深度文化之旅

當你去旅行吃喝玩樂,一年喺香港死慳,想放幾日假豪飲豪食幾日,呢班窮遊愛好者就會出現。喺佢哋心目中,乜都要慳,可以唔用錢嘅地方就唔用。

曾經有朋友話自己用一萬蚊喺歐洲玩足一個月,佢話呢種先叫深度文化遊……但乜餐廳都唔入去食,每晚返hostel煮公仔麵,又完全唔去購物,咁樣仲算唔算「深度」呢?

02 | 放眼世界返大陸最好

呢類人大多數係老一輩親戚,次次你講去咗邊度旅行,佢哋都會hard sell 自己去國內邊度邊度,消費平風景靚。

有個親戚仲話要放眼世界,唔應該剩係去日本韓國……但佢每次都返大陸,算唔算放眼世界?

03 | 香港乜都有,使乜去旅行

最後一種,就係無論你講到去旅行有幾好玩,佢哋都覺得香港最好,你話泰國嘢正,佢哋話香港都有啦!

你話日本激安好正,佢哋話香港都有阿信屋啦……喺佢哋心目中,去旅行嘅定義就係入長洲。但旅行嘅手信,佢哋就會第一個問你攞。

其實旅遊豐儉由人,你可以豪飲豪食,亦可以每日去睇書行市集,根本冇話邊種方法先係最好。最緊要就係搵到一個適合自己嘅旅行伴侶。

Tags :