去旅行,總係可以熟知一個人嘅性格。第一次同女朋友去旅行,夜晚瞓覺先發現到佢嘅真面目……

旅行太累 懶理女友萬個護膚步驟先入睡


我相信每個男人都會有相同感受,當全日耗盡體力去遊玩之後,返到酒店沖完涼,最驚嚇嘅唔係見到女朋友素顏,而係佢會塗上比起化妝品更多嘅護膚品上自己塊面度……

由於我實在太攰,未等到佢搽完護膚品同吹乾個頭,我已經進入休眠狀態。

無視男友熟睡 風球、地震、寒冰掌出動!

喺呢個時候,女朋友完全唔理會我係咪瞓緊覺,首先一嘢揭起張被,冷風一吹,我喺夢入面打緊8號風球……

之後,女朋友再好似摔角手咁一跳跳上床,「轟」一聲,我個夢境發生強烈地震。而女朋友驚死我打風同地震都仲未醒,用佢隻寒冰掌攝入我件衫入面,然後問:

「咦!原來你未瞓啊?」

入睡變手卷 搶被大戰落敗捱凍

點瞓啊大佬!算數,我個人平時好易瞓着,當我第2次進入夢鄉,女朋友就一個轉身,好似手卷咁將成張被捲住自己,而我只得3分1張被,勉強冚得住我隻手臂……

平時嬌小柔弱嘅女朋友,估唔到瞓覺會變得孔武有力,我點扯都扯唔郁張被,冇辦法之下,我只能夠縮到蝦米咁繼續瞓,心諗只要捱到天光就得。

點知瞓到半夜,女朋友要起身屙夜尿。我喺睡夢中清晰咁聽到佢恍若巨人嘅腳步聲,急步咁跑入廁所,「砰」一聲放低廁板,解決完之後,再「碰碰碰碰」跑返嚟床邊,「轟」!再一嘢跳返上床。

我成個人清醒晒,用無奈嘅眼神望住佢……結果,只係換嚟一句:

「咦!嘈醒你啊?」

去旅行真係可以睇清楚一個人,不過有個方法,至少可以制止到女朋友搶被,就係……攬實佢嚟瞓!

下一頁:女朋友瞓親我膊頭都流口水 | 藍橘子

延伸閱讀:玩出血!?同女朋友去水上樂園嘅悲慘經歷 | 藍橘子