聖誕節原本同阿媽join咗團去台灣玩,點知突然第三日有事去唔到咁多日,於是旅行社畀我哋轉去其他同等價錢以下嘅團。由於時間太趕冇晒選擇,於是就join咗一個仲有好多位剩嘅大陸美食團,中伏之旅就此拉開序幕……

text:空中飛傭 The Flying Maid | photo:網上圖片、《新假期》圖片資料庫

Hard sell 仙丹神藥 | Mean指數:★★★☆☆

美食團第一個景點係去咗一個賣藥嘅地方,入咗間房之後,有個聲稱係中醫嘅女人就開始說我哋買嘢,講到啲藥幾有功效,死都救番生等等,然後仲有啲sample、藥膏、養生茶畀我哋即場試下。可惜,雖然佢花咗咁多唇舌,最後都冇咩人買。

大陸美食團
圖片來源:BlogSpot

大陸美食團
圖片來源:BlogSpot

於是我哋上番架旅遊巴,點知有幾個藥店啲人上埋架車sell,佢哋隊埋件貨喺你面前叫你買,但都冇咩人騷佢哋,如是者咁樣sell咗10分鐘,有香港人忍唔住出聲:「要買就一早買咗啦!成點喇!我未試過成點都未食飯㗎!捨得開車未呀?」「離晒大譜㗎……食飽咗先叫我買嘢我都鋸啲吖……餓住個肚喺度聽你廢『口翕』……」

大陸美食團

真・豬仔團 | Mean指數:★★☆☆☆

好啦!兩點幾終於去食第一餐,有雞有鴨嘅,但其他都係啲白菜呀、豆腐、瓜,隻雞仲要係凍嘅,然後啲飯係一個鐵兜裝住畀大家食。然後有個香港女人見到,就話:「哇!餵豬呀?」佢老公就話:「有得畀你食咪算好囉……」

大陸美食團

「伏」古圍村 | Mean指數:★★★☆☆

食完飯又去一個景點,導遊吹到話係一個文化遺產嘅古鎮,大家都相當之期待。旅遊車揸咗個幾兩個鐘差唔多到,啲香港人又開始出聲:「哇!山卡啦嚟嘅?」一望出窗,一片荒地,條路仲要勁窄到得單線行駛。另一個香港人話:「做咩車我嚟呢度呀?睇爛地呀?」導遊話:「我哋喺度參觀半個鐘,半個鐘返嚟集合。」香港人話:「唔那係呀?半個鐘?半分鐘得啦……返酒店啦我哋。」

大陸美食團
我們以為是這樣。

大陸美食團
實際上是這樣。圖片來源:Wikimedia Commons

一落車,有啲村民喺地下度擺檔,賣下啲山草藥材,周圍其他都係冇咩農作物嘅耕地,仲有啲一潭死水嘅池塘,再行前少少就見到有啲好傳統嘅屋,掛滿晒啲臘鴨,啲香港人見到就話:「咩呀?帶我嚟睇臘鴨呀?」「我唔好返去香港圍村睇!」

大陸美食團

大陸美食團

好啦!睇完呢個好值得睇嘅古鎮之後,我哋終於返酒店,呢間酒店係一間溫泉酒店,夜晚仲有一個幾出名同埋幾乎唔知佢係乜水嘅明星表演添!而夜晚嗰餐係OK嘅!

大陸美食團

繼續hard sell | Mean指數:★★★★☆

到咗第二日食完餓狗搶屎嘅自助早餐,上到車香港人又圍埋開始投訴:「哇!呢個團下次應該執L咗㗎喇!」「室外溫泉?室內青苔就有!」「間房啲熱水忽冷忽熱嘅?」「啱囉!十足你咁樣囉!忽冷忽熱……」

大陸美食團

佢哋你一言我一語,導遊上咗車用唔鹹唔淡嘅廣東話講:「各位早晨,等我介紹下今日嘅景點先……」香港人話:「係咪返香港喇?」導遊:「我哋依家會去寶珠城……」香港人話:「哇!又水我哋買嘢呀?」之後成日嘅景點,全部都係入一間房,然後有人係咁sell你買嘢,唔買再上旅遊車sell。最後個導遊話:「希望下次見~」香港人話:「睬過你呀!下次見?除非我傻咗啦!」

大陸美食團

好感激呢個團令我喺2017仲有幾日就完結之前,有機會中埋本年度最勁嘅伏。作為一個本身好唔鍾意人哋乜都投訴嘅香港人,今次聽到啲香港人投訴,簡直句句都中晒我心聲,直插我心坎。

圖片來源:CapTV

香港人mean到爆嘅投訴聲,簡直可以圍繞地球三日,再傳遞到宇宙邊端。好多謝我啲團友,可以喺伏味濃嘅環境,仲保持到一個mean嘅高亢姿態,令整個伏味加添咗唔少趣味。如果要搞一個全球最mean大獎,我一定會投你哋一票,冠軍你哋當之無愧。其實,mean都只不過係對任何事情都有要求!香港人,I am so proud of you!真係要寫個「服」字畀你哋!

延伸閱讀:返大陸唔使與世隔絕!超簡單的免費翻牆軟件教學 | Pazu 薯伯伯

下一頁:正式插旗 淨土失身|中國客機登陸南極 從今「強」力推動極地旅遊