因為我大假已經用光光,女朋友又剩番好多日,於是佢就同一班女仔去旅行,目的地係韓國。原本我以為只得女仔同遊,應該唔會有咩大問題,點知……

女生同遊血拼收穫大 唔識路靠「女人直覺」


幾日後佢返到嚟香港我去接機,見到佢嗰剎那我仲以為佢變咗隻駱駝,除咗個行李箱之外,仲攞住幾大袋戰利品。返屋企時聽佢講嗰幾日嘅行程,原來一班女仔去旅行係咁恐怖。講番女朋友今次行程,起初我仲驚佢幾個女仔會蕩失路或唔識搭地鐵,點知女朋友話:

係啊,我哋真係唔識路去地下街,因為冇人識睇地圖,只能夠望下邊度似有衫賣,啲人群向咩方向行,我哋就搵到喇~

原來女仔購物慾,可以強到好似隻獵犬追蹤動物咁……

圖片來源:visitkorea

行街大不同:男人樣樣彈 女人件件讚靚 交換心得

另外,女朋友講話,今次冇咗一班男人阻頭阻勢,呢樣又話唔抵,嗰樣又話唔靚,買衫買得好自在。為咗降低買得多嘢嘅罪惡感,佢哋會互相讚對方揀嘅衫好靚,令每件衫都有「非買不可」嘅錯覺,結果就買咗一大堆戰利品返香港。

行化妝品店,我每次都等到喺店入面瞓着咗,瞓醒見佢仲試緊……而家成班女仔可以試到夠皮,仲可以互相交流化妝技巧,邊隻色唇膏襯,眼線應該點畫……

girl-hang-out-makeup

「情況就好似你哋成班男人圍埋一齊砌高達咁囉!!」女朋友。
「你都黐線!男人砌高達邊會交換啲手手腳腳嚟砌……」

「總之就……差不多係嗰種爽歪歪,如入無人之境嘅感覺啦!」

男友 vs 閨密遊 哪一種更開心?

「咁即係冇咗我仲開心啦!可以瘋狂買嘢!」我含淚咬唇咁向女朋友怒吼。
「唔係啊,冇咗你喺身邊,半夜冇人陪我去廁所,食飯冇咗你呢個大飯桶,韓國樣樣都咁大碟,選擇少咗好多。同埋唔知點解,同你去旅行個感覺好似開心啲。」

girl-travel-shopping-crazy

「但係你望住堆戰利品時,個表情唔係咁講喎!!」
「我有買手信畀你呀!」
「真係?」
「係啊!你而家試下好唔好睇。」
「好啊!」

當我興高采烈想除晒身上所有衫褲,變身成韓星look之際,女朋友喺行李箱攞咗件手信出嚟……
我一望到虎軀一震!
原來係幾對韓國賣1,000won嘅襪仔……

專頁:http://www.facebook.com/BlueGodZi
Ig:blueGodZi

 

下一頁:星級閨密旅行|胡杏兒帶路 好姊妹遊澳洲|《胡說八道真情假期》

相關文章:人人羨慕!| 閨密 級友誼6大特質