去旅行最地獄級難度嘅挑戰,唔係搶平機票,因為只要你平時留意多啲廉航資料,填資料時夠手快,總有機會搶到。

機票行程非難事 公司搶假期大挑戰


至於儲錢去旅行、plan行程、訂酒店通通都係事在人為,去旅行一向都係豐儉由人,不論你窮遊定係杜如風式購物旅行,最緊要自己開心。

而去旅行最大挑戰,係同公司班同事「搶假期」……

37584_WM
《孤男寡女》截圖

請假潛規則 越高職級越早請假

以我前公司為例,有個非常公平嘅潛規則,就係根據職級嚟決定請假嘅先後次序,意思即係話,上司想連住紅日請大假去長途旅行,你就只能食上司嘅餸頭餸尾,連到1日紅假都偷笑。

公司部門有3個上司,每個上司有廿日大假。佢哋同家人去長途旅行共聚天倫,我哋低級嘅就慘到無倫。

有次聽見有個上司走出嚟同我哋講:「聖誕節我個女要補習,去唔到旅行,你哋要把握機會喇~」喂阿哥……到底你知唔知聖誕節機票同酒店幾貴啊?

《愛回家》截圖
《愛.回家》截圖

除咗要俾尊貴嘅上司揀假期,同一班同事搶假都係場戰爭。

撞假難遷就 同事關係決裂?

有次,女朋友打電話俾我話搶到平機票,另一邊又聽見同事Mary想嗰個月同男友去法國旅行……同事嘅關係就係咁決裂!遷就同事?定係遷就女朋友?

喺呢個時候,通常就要出絕招(其實係賤招)。一方面同女朋友講今次旅行冇問題,默默咁訂機票plan行程。另一方面,祝同事Mary同男友玩得開心啲,同時叫佢小心,唔好兩個人去,3個人返。喺公司嘅一舉一動都要表現得正常。

為放假出絕招 免損同事關係

當到達去旅行嘅日子,打電話返公司話住鄉下嘅遠房親戚突然有事,喊咁口同上司講,話個親戚由細睇到自己大,非常錫自己,一定要返鄉下幾日。

Boom!幾個鐘後,笑容滿面咁拎住個行李箱喺機場同女朋友會合!喺登機入閘口,仲見到 Mary 拖住佢男友……

我同Mary四目交投,佢向我微笑點頭表示理解,反正大家都有得去旅行,win win局面。同事之間嘅關係,亦因為咁而越來越穩固!

Tags :