我從來都好鍾意熱鬧,最好就一班兄弟朋友開開心心一齊闖蕩下!尤其當年 grad trip 成班窮學生一齊去旅行,加上好多都係第一次搭飛機。每一件事都好新奇有趣,真真正正嘅大鄉里出城!但人愈大,朋友都難約,咁不如試下 一個人去旅行 !

約朋友等十世 不如自己去


雖然行程唔多,但能夠同一班朋友經歷「第一次」,成件事真係畢生難忘!但自從大家離開中學校園,去大學讀書、踏入社會做嘢,朋友圈子變得更廣更闊,個個都忙到傻……有啲直頭人影都唔見……

當連約食飯都變得困難嘅時候,莫講話約去旅行……約咗十年都未約到,有啲地方、有啲青春未必再會等你,最後我亦有自己一個出發嘅念頭。冇錯,就係人哋所講嘅「單飛」~~~

「一個人旅行」3 大好處 行程驚喜處處

或者好多人對於「一個人旅行」有好多疑問同好奇,而當初我都聽到其他人講一個人出發嘅「好處」!

  • 自由自在,想去邊就去邊
  • 唔使理同伴感受同脾氣
  • 最重要係想幾時飛、飛去邊,完全自己一個搞掂晒

雖然我本身鍾意熱鬧,而我起初都覺得冇問題,但可以自己一條友探索下、認識下新朋友,都咪話唔爽歪歪!自己嘗試 plan 晒所有行程,以 backpacker 形式旅行認識新朋友(原來都幾多趣事),甚至連搭飛機都可以同隔籬條友傾偈。好多事,係你事前完全估計唔到!

旅程辛酸事 靠自己難分享食物

咁係咪代表一個人旅行真係正到傻,以後都係自己去?其實當中都會有佢嘅辛酸,尤其我呢啲咁鍾意熱鬧嘅人。例如:

  • 去餐廳食嘢得你自己,想叫多啲試下都困難
  • 見到個靚景想影相就只能靠自己/路人
  • 夜晚返到房想飲嘢吹下水又冇人(未必每個租客都咁friendly)
  • 我呢啲平時喺屋企咁懶嘅人,出到去就要學識點樣去照顧自己,唔好彩病咗嘅話就真係喊出嚟……

一試獨遊 獨立且能了解自己

講咁耐其實即係好唔好啊?相信每個人都有唔同睇法,或者真係睇你本身性格。有時候,反而因為經歷咗一啲嘢先更加了解自己。

但畀我揀,我始終都係鍾意熱熱鬧鬧。不過,我仍然鼓勵大家,「一個人旅行」點都要試一次!因為有啲嘢絕對係會出乎自己意料之外!想了解自己更多、想嘗試獨立,呢個絕對係一個好推介!

利申:自己一個去澳洲住 hostel。

熱豆腐仔 Ig: hottofuzai fb: 熱豆腐仔