每日執房變「掃貨」？朋友：唔拎就蝕底！
話說早幾個月前，小編同相識多年的好友A君去了一趟旅行，入住一間不過不失的商務酒店。Check-in後，A君一入房就雙眼發光，指著枱上的茶包、即溶咖啡說：「嘩！呢啲免費㗎喎，梗係要拎啦！」當時我都不以為意，心諗拎一兩包旁身都好正常。
點知第二日返到酒店，我發現房內所有備品，包括洗頭水、沐浴露、牙刷，甚至連鬚刨都被「清空」。我好奇問A君：「做咩全部唔見晒？」佢竟然一臉自豪地打開自己個行李箱，只見所有備品整整齊齊地躺在裡面，然後理直氣壯地說：「我哋每日都會執房㗎嘛，佢哋會refill，唔拎走咪好蝕？」聽完之後，我當下真的不懂反應，只能尷尬地笑一笑。
貪小便宜無極限？連廁紙都成目標！
本以為將每日的備品「掃光」已經是極限，誰不知，是我太年輕了。在我們準備check-out的前一晚，我竟然見到A君望住廁所那卷幾乎全新的廁紙，若有所思。我心知不妙，立即開口：「喂，你唔係諗住…」
佢竟然一臉認真地回答：「呢卷新嘅，我哋聽日就走，肯定用唔晒，掉咗咪好浪費？不如拎返屋企用啦！」我的天呀！廁紙！大佬呀，為咗一卷廁紙，要唔要搞到咁肉酸？我內心不斷咆哮：「個行李箱位留返嚟放戰利品唔好咩？」
最後，我當然係極力阻止咗呢場「廁紙偷運案」。雖然呢位朋友平時為人唔錯，但呢個行為真係令我大開眼界。成個旅程，我都不時擔心酒店會唔會以為我哋係「專業洗劫團隊」。
順手牽羊都要識分寸！酒店備品到底咩可以拎？
其實，酒店提供備品原意是方便住客，而那些一次性的消耗品，例如小樽裝的洗護用品、牙刷、茶包、樽裝水等，住客拿走是完全沒有問題的，因為即使你不拿走，基於衛生理由，酒店職員清潔時亦會將已開封的丟棄。
不過，非消耗品就絕對不能「順手牽羊」！例如毛巾、浴袍、風筒、衣架、鬧鐘等，這些都屬於酒店資產。如果真的非常喜歡酒店的某樣物品，例如質地超舒服的浴袍或枕頭，其實可以直接向酒店查詢購買，千萬不要為了一時貪念而偷偷拿走，這隨時會被視為盜竊，除了要賠錢，更可能要負上法律責任，因小失大就唔抵啦！
講到底，雖然朋友的行為令我哭笑不得，但亦意外地成為旅程中一個極度難忘的「景點」。不過經此一役，小編下次再同佢去旅行，可能會認真考慮訂兩間單人房，費事又嚇到個心離一離！
酒店房入面有咩係可以拎走？
一般嚟講，一次性嘅消耗品都可以拎走，例如樽仔裝嘅洗頭水、沐浴露、牙刷、牙膏、梳、茶包、咖啡包、樽裝水等。基本上就係你用咗酒店都會掉嘅嘢。
咁有咩係絕對唔可以拎走？
非一次性嘅物品就絕對唔可以拎，例如毛巾、浴袍、風筒、衣架、水杯、鬧鐘、遙控器等等。拎走呢啲物品會被視為盜竊，酒店有權追討甚至報警處理。
如果我真係好鍾意酒店嘅浴袍或者枕頭，可以點做？
好多酒店其實都有提供販售服務，如果你真係好鍾意某樣物品，可以直接向酒店前台查詢購買方法。咁樣就可以名正言順咁帶佢返屋企，唔使偷偷摸摸啦。
