大家如果好似編輯咁成日返嚟台北(冇用錯字,係「返嚟」),都唔會唔知台北車站地下街以及臺鐵/高鐵車站大堂都設置不少儲物櫃,如果你準備喺台北玩完後,喺台北車站起搭 1819 去機場或者搭臺鐵/高鐵落台中/台南/高雄,除了你前一晚住的飯店提供的行李暫存服務外,你應該都會首先考慮用台北車站地下街的儲物櫃暫存行李。

圖文授權:台灣.日和

01 | 儲物櫃爆滿可以選擇行李房

不過星期六、日或者長假期,因為好多旅客會到台北玩嘅關係,儲物櫃係接近100%爆滿,你係冇乜可能會搵到有吉的櫃放行李,亦都會見喺北車地下街有啲人會遊走搵儲物櫃(小編都試過);又抑或你啲行李太大件,連個locker都入唔到嘅時候,大家其實仲有一個辦法: 臺鐵行李房 !

臺鐵行李房

其實臺鐵行李房並非一個新鮮嘅事物,本身喺好多嘅火車站都有行李房呢樣嘢的(大站如台北、台中、嘉義等都有的,小編都喺台南火車站用過行李房放行李),主要負責行李暫存及行李託運的業務。

臺鐵行李房

臺鐵行李房

02 | 行李寄存的費用,以行李的件數及大小計算

編輯上次都係喺地下街搵咗一輪都冇吉櫃後,先醒起嚟呢度放低行李,然後就喺火車站東一門直行(東三門都可以),直走到中間路口,就會見到台北車站的行李託運寄存中心了。行到入去,職員會先問你有幾多件行李要寄存,因為佢係以件數嚟計算的。然後佢就睇你每件行李嘅size嚟收費,同埋安排位置畀你擺,畀咗錢之後,職員會畀番張收條你,記住要keep好佢,走嘅時候攞番行李都係靠佢。另外,佢會問埋你幾點返去攞,你答番大約時間就可以,佢都係想睇你喺佢關門前去唔去到攞番。

臺鐵行李房

臺鐵行李房

03 | 比儲物櫃更便宜及方便

好啦!如果小編唔講錢都係會傷感情的。行李暫存收費係以件數同存放日數計算的,物件長寬高加埋係100cm或以下收NT30/日,介乎101-150cm收NT50/日,而151cm或以上就收NT70/日,編輯當天寄咗三件喺行李房,total收咗編輯NT130,當然職員通常一眼就睇得出你件行李嘅size;同埋行李房每日開8:00am-8:00pm,如果你8:00pm前都未攞番行李,你就要第二日先可以攞得番,同埋好有可能要畀多日行李寄存費。

臺鐵行李房

如果就咁睇, 臺鐵行李房 會稍為抵過同方便過地下街嘅儲物櫃。(地下街大櫃NT70/3小時,儲足半日大概6小時就總共要NT140,而且只收硬幣,但行李房畀大紙有得找;不過,未必抵得過臺鐵剪票口NT100嘅大櫃)。但小編認為要視乎番你有幾多行李要暫存、地下街仲有冇吉櫃,以及你件行李放唔放得入個櫃入面,如果真係冇晒吉櫃的話,或者你件行李太大件,都可以考慮一下臺鐵行李房的。但長假期行李可能會比較多,編輯會建議大家打去問一問仲有冇位寄先。

臺鐵行李房

PS:上面講過臺鐵喺好多車站都有行李房,同樣提供行李暫存服務,不過本文以台北車站的為準。

台北站行李託運寄存中心
地址:台北市中正區北平西路(台北車站東一門/東三門直行至第二個路口就會見到,小心過馬路)
電話:(02)2314-1223

Useful Link:

臺鐵車站寄物櫃一覽及收費:http://www.railway.gov.tw/tw/CP.aspx?sn=15716&n=18765

臺鐵行李暫存收費:https://www.railway.gov.tw/tw/cp.aspx?sn=18309