一年一度嘅美國音樂盛事Coachella，向來係全球潮人嘅朝聖地，每年都吸引無數樂迷遠赴當地狂歡。點知今年竟然樂極生悲，喺4月11日晚驚爆恐怖高空墮物意外！有女觀眾喺欣賞DJ表演期間，慘被一組極重嘅燈光設備從高處擊中，當場頭部重創、血流如注，場面極度駭人！

事發一刻全直擊女觀眾頭部遭重擊濺血

事發喺當地時間晚上8點左右，當紅DJ John Summit正在Do LaB舞台上表演，現場氣氛高漲。豈料，舞台上方一組巨型燈光設備突然無預警墮下，不偏不倚砸中台下一名女觀眾頭部。據目擊者Joey Freshour大呻，傷者當場頭部出現恐怖裂傷，大量鮮血湧出，「燈具同地面都見到血跡」，情況相當嚇人。佢更指該組燈具重量驚人，普通人根本難以搬動，可想而知撞擊力有幾強勁，簡直係攞人命！

目擊者怒轟主辦方安全管理嚴重失當

事件曝光後，現場畫面喺網上瘋傳，大批網民替事主不值，更對主辦方嘅安全措施提出嚴重質疑。目擊者Joey Freshour就喺現場拍片保存證據，並喺鏡頭前怒轟主辦方安全管理失當：「咁嘅情況根本唔應該發生！Coachella音樂節到底喺度做咩？」佢批評意外發生後，竟然要靠周邊3名觀眾合力將傷者抬離現場急救，質疑大會應變能力不足，罔顧入場人士安全，簡直當人命係草芥！

舞台急關閉封鎖強風疑為意外真兇

意外發生後，保安人員隨即宣佈Do LaB主舞台需要緊急關閉，並將有關區域全面封鎖，氣氛緊張到好似「犯罪現場」一樣。外界普遍推測，意外元兇可能係事發當日嘅強風。有現場人士指出，演出期間風力急劇增強，惡劣天氣更導致多個環節受影響，包括電子音樂人Anyma嘅深夜演出被取消，連營地帳篷都被吹翻，可見當時風勢何其猛烈。事件再次為大型戶外活動嘅安全問題敲響警鐘。