香港打工仔日日OT做到隻狗，人工又唔見加幾多，真係「工字不出頭」？最近內地就有一位35歲前工程師，因厭倦高壓職場生活，毅然辭去高薪厚職「裸辭」轉行，估唔到結局竟然係靠街邊擺檔，月入高達5萬人民幣（約5.7萬港元），令一眾打工仔睇到眼都凸埋！

35歲工程師裸辭擺檔日賣1000個肉蛋堡

綜合內媒報導，呢位主角係北京一位35歲嘅劉先生，本身係一名軟件工程師，但因為頂唔順日復日嘅高壓工作，今年決定劈炮唔撈，轉行喺街邊擺檔賣肉蛋堡！佢專揀地鐵口等人流旺嘅地方開檔，每個肉蛋堡只賣5蚊人仔（約5.7港元），憑住自創配方同口碑，生意愈做愈旺，家陣每日平均可以賣超過1000個，月賺約5萬人民幣！為咗建立食客信心，佢仲強調用料高質，選用「胖東來」食用油同「山姆」雞蛋，兼且全程明檔製作，夠晒透明度！

事件曝光後網民洗版熱議收入真偽

事件喺網上曝光後，即刻引起網民洗版式討論，唔少打工仔都大呻羨慕：「真係行行出狀元，我哋做到嘔血都冇咁高人工！」、「讀咁多年書為乜？不如去擺檔算啦！」不過，亦有大批網民提出質疑，認為數字有水份：「月入5萬？計咗成本、人工、租金未？」、「當客係水魚咩，邊有咁易賺」、「呢啲只係倖存者偏差，大把人擺檔蝕到入肉啦！」，擔心呢啲只係一時三刻嘅成功。

事主霸氣回應質疑已請4名員工擴展藍圖

面對網上兩極嘅評論同質疑，劉先生就似乎一啲都冇有怕，更以行動霸氣回應！據了解，佢嘅生意已經唔係「一人小店」咁簡單，目前已經請咗4個員工幫手，證明生意額相當穩定。佢仲話，未來目標係繼續優化產品質素同經營模式，計劃逐步擴展經營規模，喺更多地點開設據點，睇嚟佢嘅「肉蛋堡王國」藍圖已經相當清晰，絕對唔係玩玩下！