街頭驚現水豚跨欄！下一秒意外直擊要害 網民睇到腳軟：隔住Mon都覺得痛！

水豚君街頭仆倒再挑戰跨欄慘劇收場

從瘋傳嘅影片可見，一隻鴨仔同一隻水豚充氣公仔喺街邊狂奔，鴨仔身手敏捷，一嘢就輕鬆跳過欄杆。點知輪到後方嘅水豚君，因為對腳太短，未跨欄就先喺行人路「仆咗個街」，場面非常狼狽。但佢並無放棄，起身再接再厲挑戰跨欄，點知就係呢個決定出事！佢一腳跨上欄杆時疑因腳滑，成個人重心不穩，下體要害位置不偏不倚，直撼冰冷嘅金屬欄杆！

影片曝光群組洗版男網民睇到腳軟

呢段「蛋蛋的哀傷」影片曝光後，隨即喺各大社交平台及群組洗版，尤其係男性網民反應最為激烈，大批人替事主不值，紛紛留言慘叫：「隔住個mon都feel到痛」、「睇到我即刻縮一縮」、「呢種痛只有男人先會明！」。亦有網民抵死留言：「頭撞到痛啲定蛋撞到痛啲？」、「對唔住我嘴角失守了」、「腿短的悲哀」。

神秘扮演者身份成謎網民笑稱公仔係公嘅

雖然事主著住厚厚嘅充氣公仔衫，相信有一定緩衝，但睇見佢撞擊後嘅反應，都咪話唔痛。事件引發熱議後，唔少網民都好奇扮演者嘅真實身份同埋有冇受傷，不過至今仍然係一個謎。唯一可以肯定嘅係，經過今次「慘痛」教訓，網民都一致裁定：「呢隻水豚一定係公嘅！」，令呢單意外變成網絡熱話，笑爆全城。