泰國旅遊港人要小心！病到五顏六色，最無助嘅時候Call白車求救，本應係最安全嘅選擇，點知竟然會變成一場畢生難忘嘅噩夢！最近泰國一位30歲混血女星就大呻，自己喺屋企因為嚴重過敏而call救護車，結果上門嘅「救護員」竟然係一隻披著羊皮嘅狼，趁佢全身無力，對佢做出令人髮指嘅禽獸行為，事件震驚全泰國！

女星全身無力慘遭救援義工蹂躪拍裸照

事發喺3月31日凌晨，30歲嘅女星Christine因為食錯藥引發嚴重過敏，呼吸困難，朋友急忙幫佢Call白車。點知，一名男救護員率先同大廈保安上門，但就不斷搵藉口拖延，唔肯即刻將女星送落樓。最恐怖嘅係，當保安為咗帶警察上樓而短暫離開單位時，呢個黃金空檔就變成咗女星嘅地獄！該名男子見四下無人，竟然趁住Christine因藥力影響而郁唔到，強行脫去佢嘅衫褲進行性侵猥褻，更變態到用手機拍下裸照！女星事後泣訴，當時自己雖然全身無力，但意識完全清醒，只能眼白白睇住自己被蹂躪，內心極度恐懼！

事件曝光後網民群起聲討力撐女星勇敢發聲

事件曝光後，大批網民即刻湧入Christine嘅社交平台替佢不值，群組洗版式鬧爆疑犯行為「人神共憤」、「禽獸不如」！唔少網民大讚女星非常勇敢，願意企出嚟揭發事件，避免再有下一個受害者出現，「多謝你嘅勇敢，你保護咗好多女仔」、「支持你！一定要將罪犯繩之於法」。同時，亦有唔少過來人留言分享經驗，為佢提供法律意見。Christine亦特別澄清，自己當時只係著住普通T恤長褲，事件同衣著完全無關，直斥外界唔應該將責任歸咎於受害者。

警方火速拘捕35歲疑犯揭其驚人義工身份

喺輿論壓力下，泰國警方火速採取行動，喺同日就拘捕咗一名35歲姓Nikorn嘅疑犯。不查不知道，一查嚇一跳！原來呢位所謂嘅「救護員」根本唔係正式嘅醫護人員，只係一名救援義工，懷疑係利用制度漏洞混入救援隊伍犯案！被捕後佢辯稱只係「一時衝動」，而受害人嘅裸照並無外流。目前警方正將疑犯同受害人身上採集到嘅DNA進行比對，案件仍在調查中，全城都希望可以盡快還女星一個公道！