喺屋企Hea吓睇電視，絕對係人生一大樂事，但如果睇睇吓發現身邊多咗個「朋友」，仲要係致命嗰種，真係嚇到個心都離一離！最近泰國就有位男屋主，經歷咗呢個驚魂時刻，佢喺客廳梳化睇電視期間，驚覺身邊竟然有條巨型生物，近睇發現係4米長嘅眼鏡王蛇，嚇到佢即刻衝出屋外求救，過程被分享上網後，嚇傻大批網民！

客廳傳出詭異聲響驚見4米長眼鏡王蛇

事發喺4月6日晚上大約8點，泰國一位男屋主當時正悠閒咁坐喺客廳睇電視，點知期間不斷聽到身邊傳嚟奇怪嘅異動聲。佢初時不以為意，但當佢擰轉頭望真啲，即刻嚇到魂飛魄散！原來喺佢身邊嘅，竟然係一條長達4米、重約3KG嘅巨型眼鏡王蛇！事主憶述當時情況，表示自己當場嚇到成個人彈起，完全唔敢亂郁，之後先搵到機會衝出屋外，慌忙報警求助，真係隔住個Mon都覺得驚！

驚險畫面曝光網民睇到腳軟大讚屋主夠冷靜

事件曝光後，相關嘅驚險畫面嚇壞大批網民，紛紛留言表示「睇到腳軟」、「如果係我應該已經嚇暈咗」！唔少網民都大讚事主反應夠快夠冷靜，「可以喺4米長眼鏡王蛇面前保持鎮定再逃走，真係好犀利」、「呢個距離真係生死一線間」。亦有網民錯重點，笑指「條蛇都係想陪你一齊睇電視啫」，不過更多人提醒大家，泰國天氣炎熱，蛇蟲鼠蟻容易入屋，大家真係要時刻保持警惕！

捕蛇專家15分鐘火速制服巨蛇結局曝光

救援人員接報後火速趕到現場，由於眼鏡王蛇有高度攻擊性同致命劇毒，捕蛇專家都唔敢掉以輕心。經過一番小心翼翼嘅對峙，專家最終用咗大約15分鐘，就成功將呢條巨蛇制服，並安全放入袋中，解除一場家居驚魂。據悉，呢條眼鏡王蛇之後會被送往國家公園野放，等佢可以回歸大自然。雖然結局有驚無險，但相信呢次經歷，絕對會成為屋主一世難忘嘅恐怖回憶！