北上酒店恐怖經歷！浴巾驚跌「二手偉哥」女客連換3房全中伏酒店竟反屈自導自演？

港人北上消費成熱潮，不少人為求安心會選擇入住連鎖酒店，點知隨時中大伏！最近有位女住客就大呻，喺內地一間知名連鎖酒店嘅浴巾入面，竟然發現一盒已經拆封用過嘅「偉哥」（壯陽藥），一晚連換三間房都遇上衛生問題，酒店方事後嘅處理手法仲令人髮指，直頭當客係水魚！

浴巾跌出二手偉哥事主一晚連換三房

事發喺4月3日，一位劉姓女住客入住山西太原市一間知名連鎖桔子酒店，展開一場恐怖住宿體驗。事主大呻，佢入到第一間房已經發現水龍頭污漬斑斑；要求換房後，點知第二間房更恐怖，當佢沖完涼準備用浴巾時，一盒已拆封用過嘅「偉哥」竟然由毛巾內跌出，嚇到佢即時向酒店投訴！由於第二日要趕飛機，佢無奈接受換到第三間房，結果房內又充斥濃烈煙味，成晚體驗極差。

酒店反屈事主自導自演網民群起鬧爆

事件曝光後，酒店方嘅離譜回應即時點燃網民怒火！據事主透露，酒店經理最初只提出「升級套房加100蚊人民幣」了事，被佢斷然拒絕。事主堅持要求三倍賠償，並保留「偉哥」做證據。點知酒店第二日竟打嚟，暗示翻查CCTV後，懷疑係事主自導自演帶藥物入房！呢個講法即時引發網民洗版式鬧爆：「毛巾根本無換過啦！」、「反屈個客？太離譜！」、「這種酒店還敢住嗎？」，狠批酒店推卸責任嘅做法可恥。