去日本旅行，總會見到街頭巷尾梗有一部自動販賣機，口渴時買支飲品超方便，簡直係唔少港人遊日嘅「補給神機」！但呢個熟悉的風景可能好快會變天，最新數據顯示，日本嘅飲品販賣機正以前所未有嘅速度消失，單單一年就狂減9萬部，數量更跌至30年來新低，究竟發生咩事？

一年狂減9萬部！日本人呻貴到買唔落手

根據日本飲料綜合研究所嘅驚人報告，全國飲品販賣機數量喺2025年跌穿200萬大關，只剩195萬部，比起舊年足足少咗9萬部，創下史上最大單年跌幅！昔日嘅「總有一部喺左近」已經唔再係必然。背後最大元兇就係「加價」！有日本民眾大呻，樽裝水、綠茶、咖啡等基本飲品，價錢比起幾年前硬食貴咗超過兩成，以前幾十円就可以隨手買支，而家禁個掣都覺得「肉赤」，完全失去咗衝動消費嘅樂趣，難怪連本地人都頂唔順，寧願捱渴都唔買！

網民齊數替代品！便利店超市成慳錢新寵兒

事件曝光後，大批網民替荷包不值，紛紛喺網上分享「慳錢大法」，群組即刻被洗版！唔少精明消費者指出，販賣機已經唔再係最抵買嘅選擇。好多人轉場去便利店，雖然定價差唔多，但便利店經常有折扣券或者買飯糰送飲品嘅優惠，計落著數好多。更有慳家嘅網民教路，直接去超級市場或者藥妝店入貨，價錢平一大截，就算要行多幾步都絕對值得。甚至有人索性上網成箱成箱咁訂購，再放雪櫃慢慢飲，成本效益完勝街邊販賣機！

昔日風景不再？專家預測消失潮或將會持續

雖然目前日本仍有近200萬部飲品販賣機，短期內唔會完全消失，但呢股「消失潮」已經敲響警鐘。有分析認為，喺物價飛漲嘅大環境下，如果營運商再諗唔到新橋去吸引返已經變心嘅消費者，販賣機嘅數量好可能會繼續插水式下跌。呢個曾經代表住日本便利文化嘅標誌，未來或者會買少見少，大家下次去日本旅行，見到心水販賣機可能真係要影相留念喇！