安坐家中，最怕就係有不速之客打擾！最近美國一對夫婦就經歷咗超離奇嘅一幕，朝早喺屋企享受緊悠閒時光，點知突然有人敲門，一開門去後花園睇，竟然見到一個「天降巨物」直闖自家範圍，上面仲有十幾個人同佢哋揮手Say Hi，真係嚇到個心都離一離！究竟發生咩事咁誇張？
夫婦家中做瑜伽突被敲門直擊後花園驚人一幕
事發喺4月18日朝早大約8點半，美國加州一對夫婦亨特同珍娜（Hunter and Jenna Perrin）當時一個睇緊電視，一個做緊瑜伽，非常寫意。點知突然有人瘋狂敲門，通知佢哋：「有個熱氣球降落咗喺你哋後花園啊！」夫婦二人半信半疑走去睇，眼前景象令佢哋當場O嘴！一個巨大嘅熱氣球不偏不倚就降落喺後花園草地，吊籃入面仲企滿超過10個遊客，呢班遊客完全唔驚，仲好興奮咁向屋主揮手兼舉V，場面既詭異又搞笑。
逾10名遊客高空直擊民宅原來關風力事
事件曝光後，唔少人都好奇點解熱氣球會咁失驚無神闖入民居。原來，事發地點本身就係觀光熱氣球嘅航線範圍。據操作人員解釋，當時係因為風力突然減弱，熱氣球動力不足，先焗住要緊急搵地方降落。雖然事出突然，但吊籃上嘅遊客全程表現友善，而屋主亨特亦表示，雖然成件事好突然，令佢一時之間反應唔切，但見到對方態度良好，都冇太過驚慌。
耗時2小時移走巨物鄰居齊齊圍觀食花生
由於熱氣球燃料就快用完，所有乘客需要先行離開吊籃。工作人員之後為熱氣球補充部分燃料，再喺冇載客嘅情況下重新升空，飛越民宅去到附近嘅空曠馬路先正式「收波」，最後由貨車運走。成個過程足足搞咗2個鐘，唔單止夫婦二人，連左鄰右里都走出嚟睇熱鬧，見證呢個「天降巨物」嘅奇景，齊齊「食花生」睇足全程，總算係有驚無險咁落幕！
