叫外賣最怕咩？就係個外賣仔蕩失路，等到天荒地老都未有得食！美國有位男士就因為住得太偏僻，外賣員同司機成日都搵唔到佢屋企，搞到佢不勝其煩。為咗一勞永逸解決問題，佢竟然諗到條絕世好橋，出動「空中大軍」實時導航，誇張程度嚇親唔少人，仲被人話係「炫富」！

不滿外賣仔頻頻迷路竟出動無人機空中組字導航

事主湯姆（Tom BetGeorge）住喺美國加州一個鄉村小鎮，佢大呻就算有Google地圖，啲司機同外賣員都係成日行錯路。佢試過喺街邊整個路牌指路，點知完全冇用。忍無可忍之下，佢決定玩大啲！從網上瘋傳嘅影片可以見到，當有車就快行錯路時，佢即刻出動大批無人機，喺黑夜中砌出「走錯了，請倒車」嘅巨型燈字。等架車一掉頭，無人機又即刻轉陣，變成「這就對了，繼續前進」，最後仲組合成一個巨型發光箭嘴，直接指住正確方向，成個過程就好似打機過關咁，科幻感十足！

影片曝光後網民群起公審鬧爆事主根本係炫富

事件曝光後，影片喺網上瘋傳，即刻引起網民洗版式討論！唔少網民睇完都O晒嘴，鬧爆事主呢種導航方式根本係「不惜重本」，完全係赤裸裸咁炫富，「有錢唔係咁用㗎嘛？」、「買無人機啲錢夠整條靚路啦！」大家都覺得事主將啲錢用嚟改善路面或者整啲更清晰嘅路牌好過，完全唔明點解要搞咁大壇嘢，當正自己係鐵甲奇俠咁。

事主真實身份大起底原來係無人機燈光秀公司老闆

正當大家以為事主係個有錢冇埞使嘅土豪時，劇情竟然嚟個180度大反轉！有網民極速起底，發現原來湯姆本人就係一間無人機燈光秀公司「Magical Light Shows」嘅老闆，自稱係「用光作畫的人」。呢啲大型空中燈光表演，對佢嚟講根本就係日常工作。所謂嘅「炫富式導航」，其實只係佢善用自己嘅專業技能去解決生活小問題，順便幫自己公司賣個廣告啫！呢個結局真係估佢唔到，唔少網民都話由鬧爆變佩服，大讚佢有諗頭！