老鼠問題有幾困擾，相信唔少人都身同感受。但如果情況嚴重到令人忍無可忍，你會唔會採取極端手段？近日東莞就有一名男士，因為頂唔順大廈倉庫嘅鼠患，竟然自費買入足足100個黏鼠板，喺樓梯間佈下「天羅地網」，場面極度震撼，但呢個「硬核」方法嘅結局，卻完全出乎意料！

事主出絕招自購百個黏鼠板鋪滿樓梯

事主大呻，大廈嘅鼠患問題已持續多時，老鼠不但偷食雜物，更會翻弄垃圾，極度滋擾。忍無可忍之下，佢決定採取「硬核滅鼠」行動，一口氣買入100個黏鼠板，由樓梯口到樓層轉角位都鋪滿，只留低極少位置畀人行。據悉，事主半年前亦曾用同一樣嘅招數，當時成功捕獲28隻老鼠！今次「大陣」佈下無耐，雖然有老鼠中招後成功逃脫，但事主表示絕不氣餒，誓要同鼠輩「周旋到底」！

網民鬧爆做法危險罔顧鄰居出入安全

事件曝光後，大批網民替事主慘況不值，但更多人鬧爆佢嘅做法！雖然唔少網民都話「鼠患真係可以將人逼瘋」，但喺公共樓梯間咁做實在太過火！有鄰居就表示，每次上落樓梯都「步步驚心」，更有人差啲踩中黏鼠板跌倒，險象環生。網民群起洗版，怒斥事主「解決問題不能以犧牲他人安全為代價」、「公共區域不能這麼搞，老人小孩踩上去太容易出事了」，直指做法極度自私，完全罔顧他人安全。

物業管理緊急介入清走陷阱結局神反轉

正當大家以為事件會以鄰里糾紛收場，結局卻迎來神反轉！當地社區及物業管理接獲通報後，隨即派員到場處理。不過，佢哋並唔係單純指責事主，而係先將所有黏鼠板清走，恢復樓梯安全。更重要嘅係，物業管理正視了問題根源，馬上協調專業滅鼠公司，對大廈公共區域進行全面消殺。事主嘅極端行為雖然唔啱，但總算曲線促成管理處正式處理鼠患，對所有住戶嚟講都算係一個好消息。