搭飛機最怕就係遇上Delay，但如果好唔容易上到機，先被機長告知因為航班超重飛唔到，仲要公開「招募」乘客自願落機，你又會點反應？最近英國廉航易捷航空（easyJet）就上演咗呢幕罕見奇景，機長一個廣播請求，竟然引發全機乘客意想不到嘅溫馨結局！

倫敦飛西班牙航班超重 機長廣播急徵6人落機保安全

事發喺4月11日上午，一班由英國倫敦紹森機場出發、原定飛往西班牙馬拉加嘅易捷航空（easyJet）客機，喺起飛前遇上阻滯。機師喺評估過當時嘅天氣狀況同跑道長度後，判斷飛機超出重量限制，無法安全起飛。為咗解決問題，機長竟然透過廣播，向全機乘客發出請求，希望有6名乘客能夠自願落機。當時機上嘅一位旅行社職員韋蘭（Kelly Wayland）憶述，初時聽到廣播仲以為機長喺度開玩笑，點知原來係「玩真」！

乘客挺身而出犧牲小我 全機乘客即時拍爛手掌致敬

正當大家仲喺度猶豫之際，喺短短10分鐘內，竟然真係有5名乘客挺身而出，自願放棄行程落機。呢個犧牲小我、成全大局嘅舉動，即時感動咗全機乘客，大家紛紛為呢5位「義士」熱烈鼓掌致敬，場面非常感人。因為有呢5位乘客嘅幫忙，航班最終得以順利起飛，避免咗全機人行程延誤嘅局面。

航空公司安排轉機兼補償 5名乘客最高可獲賠近4千蚊

事件曝光後，易捷航空發言人亦作出回應，表示當日已即時為該5名旅客提供免費接駁服務，安排佢哋由另一機場轉乘替代航班前往目的地，並會作出相應補償。雖然航空公司未有公佈具體補償金額，但根據英國民航局嘅建議，受影響旅客視乎延誤時間，最高可獲得350英鎊（約3,705港元）嘅賠償，總算係對佢哋嘅無私付出作出回報。