人均$200有找同老虎開P？河南動物園推「虎景房」一牆之隔睇實你網民：畀錢都唔敢住！

想唔想試下同老虎一齊瞓？最近內地有動物園推出超狂住宿體驗，盛惠唔使$200港紙一晚，就可以喺房入面同真・老虎「共處一室」，隔住塊玻璃四目交投！消息一出即刻引起全城熱話，唔少人話諗起都腳軟，但亦有大膽網民話夠平夠Gimmick，想即刻Book房挑戰膽量！

房內直擊東北虎孟加拉虎雙層防彈玻璃都驚心

據報，呢間位於河南沁陽嘅動物樂園推出嘅特色「虎景房」，索價僅168元人民幣（約$193港元），真係平到笑！住客喺房入面，就可以近距離觀賞到東北虎、孟加拉金虎同白虎等猛獸。園方為咗令住客安心，強調房間採用雙層防彈防爆玻璃，聲稱「連子彈都打唔穿」，玻璃外圍仲加裝咗電網，老虎一靠近就會觸發電擊，實行雙重防護。不過，有住客就話，雖然有玻璃隔住，但偶爾都會聽到老虎嘅吼叫聲，諗起同猛獸一牆之隔，真係少啲膽量都唔得！

網民洗版熱議反應兩極有人話抵住有人驚到震

事件曝光後，大批網民隨即喺討論區洗版，反應超兩極！唔少網民都大呼「驚到癲」，紛紛留言「遠遠看就好，真的不敢住」、「畀錢我都唔敢瞓」，認為就算安全措施做到足，心理壓力都極大，根本無可能瞓得著。不過，另一邊廂都有網民覺得超值，大讚「$168蚊仲可以睇老虎，抵過住普通民宿啦」、「好想試下同老虎一齊瞓嘅感覺」。更有網民搞笑咁話，呢個體驗簡直係「與虎同寢」，夠晒特別！