近日網上瘋傳一段超可愛又心酸嘅貓貓片，片中一隻澳洲動物收容所嘅橘白貓，一見到有人行近，就即刻飛撲到玻璃前瘋狂「拍門」，用盡全身力氣揮舞雙手，極力爭取關注，古怪又堅持嘅舉動令全網心痛。究竟呢隻貓貓背後有咩故事？

橘白貓持續兩個月瘋狂拍玻璃只為求一個家

事件主角係澳洲動物收容所Save-A-Dog Scheme一隻名叫「Vitamin C」嘅橘白貓。收容所職員透露，呢個令人心酸嘅畫面其實已經持續咗足足兩個月！只要有人影經過佢嘅籠舍，「Vitamin C」就會馬上衝上前，用兩隻前爪瘋狂拍打玻璃，動作就好似敲門同揮手一樣。職員心痛表示：「牠只是想讓自己被看見，希望能被選中帶回家」，呢個單純嘅願望，令佢日復日咁堅持呢個「求救」動作。

影片曝光惹網民心痛瘋傳揭開收容動物悲歌

事件曝光後，大批網民都被「Vitamin C」嘅舉動深深觸動，紛紛留言表示心痛並瘋狂轉發影片，令佢一夜爆紅。收容所亦藉此機會道出背後嘅悲歌，指出呢啲看似可愛嘅行為，其實反映咗收容所動物嘅真實處境。對佢哋嚟講，每一次有人經過，都係一次重獲新生嘅希望，「Vitamin C」只係用自己嘅方式，不斷為自己爭取被看見嘅機會，情況令人鼻酸。

全城集氣終迎來好消息成功獲領養展開新生活

幸好，網民嘅熱烈關注同集氣並無白費！喺影片爆紅網絡後，收容所好快就更新好消息，宣佈「Vitamin C」已經成功被有心人領養，正式告別冰冷嘅籠舍，可以喺新屋企展開幸福嘅貓生！呢個結局總算為呢個心酸嘅故事，畫上一個溫暖嘅句號。