唔少貓奴都鍾意帶主子周圍去，希望佢哋可以見識世界，但有時「驚喜」可能會變成「驚嚇」！最近有位女主人就帶住愛貓去泰國野生動物園自駕遊，點知一隻巨型鴕鳥突然熱情探訪，搞到主子當場嚇到「靈魂登出」，個樣真係睇一次笑一次！

## 女主人好心帶貓咪遊車河反變驚魂記

事緣一位女主人「@charhayy」日前帶住平時長期待喺屋企嘅愛貓，去到泰國野生動物園Safari World玩自駕遊，本來諗住俾主子一個機會睇下外面嘅世界。點知旅程途中，一隻體型巨大嘅鴕鳥竟然行埋架車度，仲好唔客氣咁將個頭伸入車窗想搵嘢食！呢個突如其來嘅「親密接觸」，令到第一次咁近見到巨鳥嘅貓咪當場嚇到成隻貓定咗格，完全唔敢郁！

## 主子瞳孔地震兼懷疑貓生網民睇到笑爆

事件曝光後，主子個超有戲嘅表情即刻引嚟大批網民洗版！由影片可見，貓咪對住眼前呢隻龐然大物，嚇到雙眼睜到勁大，眼神充滿困惑同警戒，個樣就好似喺度「懷疑貓生」，完全理解唔到發生咩事。網民睇到都笑到肚痛，紛紛幫貓咪腦補內心戲：「呢隻咩嚟㗎？我睇過最大隻嘅雀仔都唔係咁樣」、「貓：你肯定我哋喺度安全？」，更有網民抵死留言話：「隔離屋隻貓實唔信佢講嘅嘢」、「你直頭帶咗佢去侏羅紀公園啦！」

## 貓咪嚇到當機飼主全程食花生笑到收唔到聲

面對主子呢個千年一遇嘅爆笑反應，女主人不但冇嚇親，反而忍唔住全程大笑。佢仲笑言，見到愛貓個樣，感覺佢好似置身喺一個荒誕嘅夢境入面，完全處理唔到眼前嘅資訊。呢段貓咪「初見世面」嘅驚嚇片段，就咁成為網上熱話，主子個驚呆樣更被封為最新「表情包」，真係隔住個mon都感受到佢有幾崩潰！