戶外晾衫出事！澳女著底褲感下體蠕動 除褲驚見「活體」嚇到老公即刻掉咗

澳女著底褲感下體蠕動一度誤以為係雀屎

事發喺澳洲布里斯本，事主艾蜜莉（Emily Newton）日前準備帶個女出門散步，就順手拎起一條喺戶外收返嚟、已經洗乾淨嘅底褲換上。點知一著上身，佢就感覺到下體位置有啲唔對路，好似有嘢喺度郁嚟郁去！佢即刻衝入洗手間檢查，發現底褲底部有一撻奇怪痕跡，艾蜜莉憶述當時第一時間以為只係唔好彩，惹到雀屎，仲驚到大叫老公過嚟睇，擔心會唔會因此染病。

細看驚見蜘蛛連蟲卵築巢嚇到即刻掟走

正當佢仲喺度苦惱之際，嗰一撻「污漬」竟然開始蠕動！艾蜜莉鼓起勇氣再細心觀察，先赫然發現根本唔係雀屎，而係一隻蜘蛛匿埋喺個網狀巢穴入面，旁邊仲有一整包蜘蛛卵！最恐怖嘅係，啲蟲卵仲喺度不停扭動，甚至可以清楚見到有蜘蛛腳仔由入面慢慢伸出嚟，畫面極度駭人！艾蜜莉當場嚇到彈開，一邊尖叫一邊將條底褲係咁甩，一路甩到出走廊，然後即刻衝入浴室瘋狂清洗身體。

事主提醒戶外收衫前必做一步驟免中招

呢場驚魂記最後要由艾蜜莉嘅丈夫出手善後，佢幫手將蜘蛛同成個巢穴清走，而嗰條「蜘蛛底褲」亦都直接被掟入垃圾桶。經歷今次恐怖事件後，艾蜜莉心有餘悸，特別提醒大家，就算平時收衫有習慣先「抖一抖」，都絕對唔可以掉以輕心。佢表示自己就係因為漏睇咗一小處地方，先會發生咁驚嚇嘅情況，所以大家喺戶外收衫褲返入屋前，真係要逐吋逐吋仔細檢查清楚，費事惹蟲入屋就麻煩！