近日網上瘋傳一段影片，主角竟然係一個蘇州嘅2歲半人仔！片中佢手仔細細，揸住支粉筆喺地下揮灑自如，寫出嘅字體工整有力，落筆乾淨利落，完全唔似一個仲飲緊奶嘅BB仔，超強嘅反差感即時嚇親大批網民，影片被瘋狂洗版，個個都好奇呢位「神童」到底係點樣練成！

媽媽親解神童養成之路15個月大已展現天賦

事件爆紅後，男童媽媽楊女士親自解畫，原來囝囝早喺15個月大、仲係BB嘅時候已經對文字產生濃厚興趣，當時已經識寫「一」、「大」、「小」等簡單漢字！楊女士大爆，屋企根本冇人擅長書法，亦從來無幫佢報過任何書法班或興趣班，更加無刻意訓練。囝囝之所以開竅，全因細個時鍾意坐喺大人身上，睇住佢哋寫字同讀《唐詩三百首》、《三字經》，慢慢就自己認得啲字，到1歲半左右就開始有意識地模仿寫字，由圓珠筆玩到毛筆，完全係靠興趣自行探索！

網民驚嘆自愧不如成年人都未必寫得咁靚

影片曝光後，網民睇到O晒嘴，留言區被洗版式討論！唔少人驚嘆：「呢個係飲奶嘅年紀就練書法！」、「呢種天賦真係恨唔到」。更有大批網民表示自愧不如，搞笑咁話：「我寫咗幾十年字，都靚唔過一個2歲半嘅細路」、「成年人都未必寫得過佢，真係羞家！」大家都對男童著住BB衫，但又一臉認真寫書法嘅畫面嘖嘖稱奇，認為反差感實在太強烈。

意外爆紅後家人反憂心揭背後甜蜜的煩惱

對於囝囝意外成為網絡紅人，楊女士坦言感到驚喜，但同時亦帶嚟一個「甜蜜的煩惱」。佢透露囝囝對寫字極度著迷，大部分空餘時間都係用嚟寫字，專注力同耐性都超強。家人反而擔心佢年紀太細，長時間近距離寫字會影響視力，所以會專登搵藉口帶佢出街玩，避免過度用眼。楊女士最後強調，如果囝囝將來仍然鍾意書法，家人一定會全力支持，但最重要都係順其自然，尊重佢自己嘅興趣。