德國男高空跳傘玩命！極速23.33秒挑戰生死時速 結局竟然係…

德國醫科生挑戰極限刷新世界紀錄

事件主角係德國YouTuber兼醫科生Tom Kopke，佢早喺18歲第一次成功還原扭計骰時，已經萌生喺跳傘時挑戰嘅瘋狂念頭，但礙於當時資金同時間所限，一直未能考取跳傘執照，計劃只好暫時擱置。事隔多年，佢終於決心挑戰，目標係要打破由Sam Sieracki喺2023年創下嘅28.25秒舊紀錄。最終，佢以23.33秒嘅驚人時間，成功寫下「自由落體狀態下最快還原扭計骰」嘅全新世界紀錄！

影片曝光挑戰2大死穴嚇到O嘴

事件曝光後，大批網民對呢項「玩命」挑戰睇到目瞪口呆！根據健力士世界紀錄發布嘅影片，挑戰過程可謂驚心動魄。Kopke事後透露，挑戰有兩大「死穴」，首先係自由落體期間嘅巨大風阻，令佢最初嘗試嘅俯臥姿勢極難操作，最終要改用躺臥姿勢應戰。另一難關就係喺高空中由另一人手中接過扭計骰，過程稍有不慎就可能失手。佢更自爆，喺之前一次挑戰中，曾於18秒左右就接近完成，但因太早興奮而分心，最終功敗垂成，可見呢項挑戰對體能同心理質素要求極高！

神人謙稱仍有進步空間暫時封盤

喺成功挑戰嘅片段中，只見Kopke喺空中接過扭計骰後，以肉眼難以追趕嘅速度極速還原，完成後即刻向身旁攝影師展示成果，興奮之情溢於言表。對於成功刷新世界紀錄，Kopke坦言，如果繼續嘗試，相信仍有機會將紀錄再推快。不過佢笑言，現階段希望先「封盤」，讓其他人有機會挑戰呢項紀錄，盡顯神級玩家嘅風範，之後再考慮親手刷新自己創下嘅成績。