網上尋寶好多時都係講運氣，估唔到有時連個包裝盒都有驚喜！最近日本有位收藏家喺二手平台買個紅白機外盒，點知收貨一刻，發現賣家竟然用咗一件「神級遺物」嚟做包裝，價值隨時仲高過件貨本身，令佢忍唔住驚呼執到寶！

事主網購紅白機外盒驚見原廠維修專用箱

事主大呻，自己平時最鍾意喺二手平台Mercari尋寶，專門收藏狀態良好嘅任天堂紅白機同相關產品。早前佢就睇中一個「紅白機主機外盒」並成功購入，當時賣家仲特別提到，會用「當年紅白機專用運送箱」寄出。事主原本不以為意，點知一收貨拆開，先發現個所謂「運送箱」，竟然係極度罕見嘅「紅白機原廠維修紙箱」！呢款紙箱係任天堂當年專門用嚟維修主機時運送嘅官方包裝，上面仲印有早期嘅「Famicom Family」標誌，收藏價值極高，搞到事主都話：「呢個箱仲珍貴過我買個外盒！」

網民洗版驚呼博物館級珍品賣家走寶

事件曝光後，即刻引起網民洗版式討論，大批網民都話呢個紙箱簡直係「博物館級」收藏品，好多資深玩家都話未見過實物。有網民更推測，可能連任天堂官方都未必有保存到同款紙箱，紛紛建議事主可以考慮捐贈俾任天堂博物館！亦有網民笑言，原賣家應該唔係專業收藏家，只係單純將童年回憶保存得好好，完全唔知個紙箱嘅真正價值，先會咁樣「走寶」，而呢種意外驚喜正正係收藏嘅最大樂趣。

一張保證書揭主機辛酸史勾起近40年集體回憶

最有趣嘅係，事主仲公開埋隨盒附送嘅保證書，上面清楚顯示部主機係喺昭和63年（即1988年）1月買入，但單單喺同年6月同9月就送修過兩次，幾乎每三個月就要整一次！呢份維修紀錄即時勾起唔少玩家嘅集體回憶，有人話當年主機成日壞係等閒事，更有人搞笑話細個打機打得太耐，部主機分分鐘會被阿媽一怒之下「處理掉」，充滿近40年前嘅共同記憶，真係回憶返晒嚟！