講起日本東映（Toei），相信無人會唔識！由細睇到大嘅《龍珠》、《美少女戰士》、《One Piece》，仲有《幪面超人》同《超級戰隊》系列，全部都係呢間影視巨頭嘅出品，絕對係唔少人嘅集體回憶。最近，呢間巨頭突然投下震撼彈，宣佈踩過界成立全新遊戲部門「Toei Games」，消息一出即刻令一眾Game迷同動漫迷勁期待，個個都諗住終於有機會玩到東映親自操刀嘅大作，點知官方一公佈首發陣容，竟然同大家諗嘅完全唔同，搞到全城花生友跌爛眼鏡！
東映遊戲首發3款新作曝光！畫風勁獨特竟然唔係龍珠同拉打？
正當大家滿心歡喜，以為可以準備定錢課金玩《龍珠》或者《Sailor Moon》嘅全新遊戲時，東映遊戲喺4月24日就公開咗首批3款PC遊戲，竟然全部都係同獨立工作室合作嘅原創作品！第一款係暗黑奇幻風嘅《Killa: Kill the La》，玩家要扮演主角喺神秘島嶼上，用共鳴能力解開9個名叫「La」嘅人嘅過去；第二款係黑白水墨風嘅《Hino》，玩家要喺黑暗世界中對抗怪物同陷阱；最後一款係像素風嘅《Debug Nephemee》，玩家要同時玩4個小遊戲去拯救充滿Bug嘅世界。雖然三款遊戲睇落都好有藝術感同特色，但就完全唔見大家熟悉嘅經典IP，令唔少粉絲大失所望。
網民反應兩極大洗版！粉絲鬧爆「曬我時間」質疑東映自降身價
事件曝光後，大批網民替事主不值，即刻喺各大討論區瘋狂洗版，反應超級兩極！有支持者大讚東映有野心，唔靠舊本食老本，「以為佢哋只會用自己嘢整個Game，但呢個做法有抱負得多」、「《Killa》睇落好正喎！」。但更多嘅係失望嘅聲音，有粉絲就怒訴「完全唔係我期待嘅嘢」、「我曬時間期待真係嘥氣」、「全部Game個名聽落都好灰暗」、「感覺東映出獨立遊戲有啲自降身價」。唔少人覺得，東映手握咁多王牌IP唔去用，反而走去搞獨立遊戲，實在令人摸不著頭腦。
背後原因曝光！原來大IP版權受限 另起爐灶長遠或更著數？
面對網民鬧爆，其實背後原因好現實。有分析指出，東映之所以冇一開始就推出《龍珠》、《幪面超人》等遊戲，好可能係因為呢啲大IP嘅遊戲改編權，一早就同Bandai Namco同Sony等遊戲大廠簽咗約，被綁手綁腳。與其同人哋爭，東映遊戲索性選擇一條更艱難但更自主嘅路，由零開始建立屬於自己嘅遊戲品牌。雖然風險更高，但如果成功，長遠嚟講絕對可以打造出一個全新嘅王國。呢三款新作目前已經可以喺Steam加入願望清單，睇嚟東映今次係決心要殺出一條血路！
