夏天去日本旅行，除了食西瓜同參加祭典，仲有咩好做？各位準備去東京的朋友要注意啦！東京地標「東京鐵塔」最近又有新搞作，推出超夢幻的夏日限定光影騷，可以喺150米高空欣賞煙花同螢火蟲，最重要係有個超大驚喜，絕對係今年遊日必去行程！

離地150米高空睇煙花螢火蟲！沉浸式體驗日本夏祭氛圍

由日本知名數碼藝術公司NAKED, Inc.主辦的「TOKYO TOWER CITY LIGHT FANTASIA」，今年已經係第10年舉辦！今次夏季主題為「Summer Landscape 2026」，由即日起至9月6日，喺東京鐵塔離地150米高的主觀景台（Main Deck）舉行。整個活動將觀景台的無敵夜景，結合震撼的光雕投影技術，將窗戶變成巨型煙花匯演的畫布，地板上亦有煙花圖案，加上模仿螢火蟲飛舞的黃色激光燈，完美重現日本夏祭的浪漫氣氛，打卡一流！

追加竹製蠟燭裝置打卡位！附活動日期時間全攻略

除了煙花同螢火蟲，主辦方仲加碼！由6月19日起，場地中央將會展出一個用竹子和浮木製成的夏季主題蠟燭裝置，繼春季的櫻花蠟燭後，勢必成為另一個全新打卡熱點。想去的朋友記得mark實時間，活動由5月11日橫跨到9月6日，不過每日開放時間都有少少唔同，出發前記得睇清楚：

  • 5月11日至6月7日：晚上7:00 – 晚上10:50
  • 6月8日至7月12日：晚上7:30 – 晚上10:50
  • 7月13日至8月16日：晚上7:00 – 晚上10:50
  • 8月17日至9月6日：晚上6:30 – 晚上10:50

遊客福音！入場費以外無需額外收費CP值極高

講到最重點，就係收費問題！好多人都以為呢類大型光影活動一定索價不菲，但今次竟然有驚喜！官方宣佈，參觀「Summer Landscape 2026」光影騷完全唔需要額外收費，遊客只需要支付登上東京鐵塔主觀景台的標準入場費，就可以一次過欣賞到東京夜景同超夢幻的沉浸式光影騷，CP值高到爆燈！各位準備去東京的朋友，千祈唔好錯過呢個期間限定的體驗啊！