去日本旅行仲係去遊客區打卡？少年你太年輕了！最近日本興起一種名為「顏色狩獵」（Colour Hunting）的全新街拍玩法，玩法極之簡單，就係揀定一種顏色，然後喺街頭巷尾發掘所有同色系嘅事物再影低，最後砌成一張圖。呢種玩法唔單止令你嘅旅遊相喺IG上與別不同，更重要係可以令你用全新視角，發掘一個城市不為人知嘅細節同驚喜！有日本記者就親身實測，結果完全出人意表！

記者實測揀黃色主題鄉郊尋寶勁有驚喜

今次記者揀咗「黃色」作為挑戰主題，首先去到一個寧靜嘅鄉郊地區進行「狩獵」。一開始以為會好有難度，點知喺一個鐘頭嘅散步過程入面，竟然發現超多平時完全唔會留意嘅黃色細節！例如路邊護欄嘅黃色配件、石屎罅隙頑強生長嘅小黃花、垃圾收集區嘅黃色網，甚至連印度餐廳外賣咖喱Banner上面嗰一小舊牛油都冇放過！成個過程好似尋寶遊戲咁，心情都跟住變好，最後砌出嚟嘅相充滿鄉郊嘅純樸氣息，非常有Feel！

轉戰東京市中心新橋狩獵難度竟然升級

為咗測試「顏色狩獵」喺唔同地方嘅效果，記者第二站就去到繁華嘅東京市中心新橋區。估唔到一出站，挑戰即刻升級！眼球瞬間被各種黃色轟炸，由「Money Exchange」嘅搶眼招牌、儲物櫃上嘅大蜜蜂圖案、居酒屋門外嘅威士忌Highball黃燈籠，到連鎖咖喱店「Go Go Curry」嘅招牌，全部都係目標。記者甚至發現，當你專注搵黃色嘅時候，連街上著黃色衫、拎黃色袋嘅路人都會變得特別起眼，仲意外捕獲到電視台天氣預報吉祥物Sora-jiro！

兩地對比揭驚人發現原來黃色暗藏玄機

當記者將鄉郊同東京嘅「狩獵」成果拼埋一齊對比，一個驚人嘅發現就出現喇！鄉郊嘅黃色多數嚟自大自然同基本設施，感覺寧靜舒服；而東京嘅黃色就充滿商業氣息同活力，好多招牌例如儲物櫃上嘅「廣告招募」、地產嘅「最後兩棟」標示，都係用黃色嚟吸引你注意！原來呢個簡單遊戲，竟然可以揭示出一個地方嘅獨特魅力同運作模式。呢個「顏色狩獵」唔單止好玩，仲可以令你重新認識一個熟悉或陌生嘅地方，下次去旅行不妨都試下！