伊朗戰事燒到零食界！卡樂B突宣佈14款產品變黑白粉絲哀嚎：以後點認

平時行超市、便利店，最治癒嘅莫過於見到零食貨架五顏六色，尤其係港人最愛嘅卡樂B薯片，包裝搶眼又繽紛，未食已經心情好。但呢種快樂好可能好快就冇！日本零食巨頭Calbee（卡樂B）突然宣佈，因為一場遠在天邊嘅戰爭，旗下多款王牌產品將會「被黑白」，以後大家見到嘅薯片，可能再都唔同樣！

中東戰火燒到零食櫃卡樂B為慳油墨改包裝

事件嘅導火線，竟然係遠在中東嘅伊朗戰事！由於中東係全球石油供應重地，戰事嚴重影響咗「石油腦」（naphtha）嘅供應。你可能唔知，石油腦正正係生產印刷油墨嘅關鍵原料。原料供應鏈一斷，油墨採購就變得極之困難同昂貴。為咗應對呢個「災難級」嘅成本壓力，卡樂B唯有忍痛宣佈，將旗下14款最暢銷產品，包括人氣高企嘅薄鹽味、法式清湯味薯片，甚至係經典嘅かっぱえびせん蝦條，全部由彩色包裝改為黑白單色印刷！

事件曝光全城錯愕網民憂布甸都冇得食

消息一出，隨即震撼日本網民，大家對呢個「黑白色的未來」感到難以置信，擔心以後行過貨架都認唔出心愛嘅薯片。更令人憂慮嘅係，呢次危機可能只係冰山一角。有報導指出，石油腦供應中斷嘅連鎖效應，恐怕會蔓延到其他食品。由於製造布甸、啫喱等甜品嘅塑膠杯，同樣需要石油腦作為生產原料，唔少網民已經開始擔心，繼薯片之後，係咪連飯後甜品都隨時會供應不穩，直言「世界末日咁款」！