日本便利店美食競爭激烈，每次去旅行總有新驚喜！最近日本7-Eleven（7仔）又有新搞作，竟然在熱食區推出即叫即炸的「章魚燒」，引發當地熱話。有日本媒體就進行實測，更將7仔出品與人氣連鎖店「Gindaco」進行正面對決，想知便利店出品係咪真係咁高質，抑或只係「中伏」之作？結果竟然令人相當意外！

7仔即炸章魚燒索價214円貴過急凍一倍

今次7仔推出的「即炸章魚燒」由4月21日起在熱食區發售，一份3粒售價為214円（約11港元），6粒則售428円（約22港元）。有記者到場實測，發現落單後店員會即時將急凍的章魚燒放入滾油中炸起，過程極快。記者更發現，7仔章魚燒每粒重達30克，比一般章魚燒重約50%，切開後見到內裡章魚塊亦份量十足，絕不欺場！唯一不同的是，7仔為求方便，並無附上傳統的木魚碎（鰹魚片），而是將鰹魚高湯（dashi）直接混入麵漿，令每一口都充滿鮮味。

實測對決名店Gindaco重量口感竟然不相上下

事件曝光後，實測記者為求真相，決定將7仔章魚燒與被譽為「東日本最受歡迎」的章魚燒連鎖店Gindaco進行大比拼！記者買來一份6粒裝的Gindaco章魚燒，盛惠615円（約32港元），平均每粒約102.5円，比7仔每粒約71円貴上一截。實測發現，Gindaco的章魚燒每粒重31克，與7仔的30克幾乎無異。經過編輯部多人試食後，眾人一致認為兩者風味非常相似，7仔章魚燒外皮香脆、內裡軟糯，章魚夠彈牙，質素極高，完全不輸蝕給名店！

驚人結局揭曉編輯部大讚CP值極高

經過一輪激戰，最終結果出爐！雖然Gindaco的章魚燒在口感上因有木魚碎而層次較豐富，但7仔的出品在味道上幾乎能與之打成平手。考慮到7仔章魚燒的價錢平近三成，而且分店梗有一間喺左近，方便程度極高，編輯部一致認為7仔章魚燒絕對是「CP值極高」的誠意之作。對於便利店界初哥來說，首次推出即炸章魚燒便有如此驚人質素，絕對是一次超水準的登場，下次去日本旅行又多一個必食掃街之選！