「唔洗咁早Plan啦⋯⋯！」
「Plan定啦有個預算嘛。」
「次次臨尾個行程都大改嘅⋯⋯」
「Plan咗個大概先啦！我好想知每日會去邊啊～」
我係一個好懶嘅人，心目中嘅旅行都HEA爆遊。但相反，女友就鍾意塞滿晒全日所有時間，去盡晒每個景點。
所以⋯⋯每次Plan行程都會鬧交⋯⋯
嗌交位01 | 「幾點起身先？」
以下係第一個鬧交point：
「去咁多地方？咪每日都要 6 點起身囉！」
「係啊～得幾日，玩盡啲嘛。」
「去旅行仲早起身過返工…」
「去玩點同啫！」
Plan行程我同女友會有個分工，首先佢搵晒所有想去嘅地方，同埋想食嘅餐廳。而我就負責搵佢想去嘅地方點樣去，同埋安排每日行程去邊度搭邊度。而女朋友被我不停刪走啲行程，每次都感到非常不滿。
嗌交位02 | 「去幾多個景點？」
「呢日不如去多個地方啦！」
「呢度好遠嫁！坐車都坐幾粒鐘，趕唔切啦！」
「早啲起身囉～」
「唔得啊，太趕啦，玩唔晒嫁！」
「根本你就懶！」
於是，我哋又開始第二輪口水戰。
不過，無論點鬧交都好，最後都會各退一步，Plan完晒成個行程。
「好啦好啦～呢日早啲起身去兩個地方啦～」
「好嘢！至多第日訓晏啲囉好無？」
但當出發日子愈來愈近，女朋友喺出發之前，總係死唔心息咁不停加密個行程，我都會搵定點樣去作為後備行程。
結果係點呢？有好多行程的確去唔切，同埋我真係好懶，成日都唔知醒。不過旅行期間，我同女朋友絕對唔會鬧交，頂多都係互相揶揄吓對方。
嗌交位03 |「一早話咗⋯⋯」
「一早話去唔切啦，妳睇坐車坐幾耐…」我。
「你遲起身啊搞到唔夠時間玩喇！」女友。
「唔好話妳化妝化得慢！」我。
「你之前又話唔食呢間餐廳～而家又爭住食。」女友。
「我特登畀妳認叻返次咋。」我。
無論Plan行程時同女朋友點樣鬧交，去到旅行時總係會好sweet。
可能係因為呢個行程，係兩個人經過無數次爭拗同遷就傾出黎嘅結晶。
嗌交位04 |「一個Plan晒」/「一齊Plan Trip」⋯⋯ 2 揀 1
有好多人都會將成個行程交畀一個人負責，但可能某啲地方佢根本唔想去，結果佢又唔開心，Plan行程嗰個又無癮。
其實一齊Plan旅行行程，都係一個互相瞭解對方嘅好方法～
Ig：BlueGodZi
專頁：http://www.facebook.com/BlueGodZi
下一頁：「千祈唔好帶女朋友去韓國玩鐵道自行車⋯⋯」
延伸閱讀：「記唔記得同女朋友第一次旅行係咩感覺？」
相關文章：「女朋友瞓親我膊頭都流口水⋯⋯」
延伸閱讀：最討厭的 3 種「旅遊達人」
延伸閱讀：想坐得舒服就唔好坐 廉航 啦！
