提起到台灣覓食,任誰第一時間都想起台北,高雄連老二都未必排到,不過在冷門地區,租平、競爭少,將省回來的成本,投放在食物質素上,間接回饋食客,生存空間可能更大。上年年尾在高雄新灣區開幕的 MLD 台鋁生活廣場,正是走這路線,將昔日的舊鋁廠賦予新生命,變成集美食、書城、電影院和超市於一身的生活空間,旋即成當地人熱蒲地,更是博客們力推的搵食新據點,更話場內檔鱈場蟹每逢周末更賣過百隻,經常供不應求。作為吃貨的我,當然要踩踩場,睇下係咪真心平靚正先?

text:perfect hill   | photo:Hong

 

長條型廠房改建的台鋁,佔據了整整一條忠勤路地段,相當於4個足球場!記者試圖極速走一圈,原來也要化半日先行完!廣場分為地面的美食街和超市 MLD Fresh、2 樓就有書店和電影院 。這天周末到訪,還遇上露天市集,認真又大又多野睇!要數最人頭湧湧,就由最有話題的餐廳說起……

1.  一蟹四食 「真.長腳蟹」

在香港食鱈場蟹,多數都係手甩腳的解體雪藏貨,難得在台鋁的海鮮大排檔,就有生勾勾的鱈場蟹每斤只賣 NT2,250/HK$523,每隻足稱 3 公斤起跳,可供 10 人分,認真抵食夾大件。駐場潘大廚即場教路揀靚蟹:「要認住殼上的 6 粒釘哦!有奸商會把外型相似的油蟹魚目混珠」出名多肉的鱈場蟹,在這裡提供一蟹多食,蒜蓉蒸、上湯焗、避風塘炒定火鍋都無問題。大廚首推蒜蓉蒸,兩隻手指粗的蟹腳,用上蒜泥和醬油炊熟,鮮甜彈牙,好食到連手指都舐埋。

大廚教你揀蟹小Tips!
Step 1:揀鱈場蟹時記得要認住殼上的6粒釘。
Step 2:仲要按下蟹腳,睇下肉質彈唔彈。

2. 網上瘋傳!人龍巨堡!

場內另一人龍餐廳,必屬美式漢堡店,被多位台灣 Blogger 力推,店內直徑長達 16cm 的經典大漢堡,比麥記足 3 両大一倍有多!包內夾住重達 8 安士的牛肉漢堡、煙肉、蛋、芝士等,超足料,拿上手完全掩蓋記者的V臉。鬆脆麵包為自家烘焙之餘,最意外是醬汁罕地用上帶有粒粒口感的花生醬,咬第一口時麻香肉汁溢出,正!

下一頁:醫埋甜品胃!仲有閱讀城文青必訪

3. 甜品最強!直迫酒店級數

寧願棄正餐都要嗜甜的話,必到 Cake and Gelato,20多款蛋糕和果撻全由市內酒店 Hotel Dùa 甜品師傅每日親自焗製,強調只用鮮果、拒絕罐頭;記者點了士多啤梨拿破崙,灑上糖霜的香脆酥皮,牛油香澎湃,夾著榛子味的吉士和粒粒果肉,層次超豐富!Gelato 雪糕則有開心果、番石榴、牛油果等十幾種口味選擇,強調減肥中的攝影師竟連吞 3 球!

4. 更勝誠品!概念閱讀城

平日新場開幕,焦點必落在新衫新鞋新牌子,不過台鋁一反常態,以橫跨 2 樓全層的 MLD Reading 贏盡掌聲。用盡高樓底工廠空間地利,不同類別的書籍會有相對應的主題裝潢,就好像旅遊書架上,有個巨型地球儀安裝在天花,場內更預留大量空間供遊人閱讀,梳化、長椅隨處可見,不用坐地下睇書咁淒涼!

下一頁:周末本土市場,實行買餐飽!

5. 職人市集,周末到場買餐飽!

為了彌補台鋁無衫賣的缺失,每逢周末廠前空地會舉辦不同主題市集,雖然規模不算很大,只得十多個檔攤,但勝在賣的都是本土創作,當中更不乏後生仔和網店主人,趁機擺攤一圓開實體店之夢。記者超愛由兩姊妹經營的 Wow  攤檔,他們賣的布袋、銀包、證件套等,由設計、選布再到縫紉都親力親為,每件都獨一無二,而且手工超好,絕對值得支持!

總評:夠玩一日!

以行程設計的角度看,台鋁最適合周五、六和日到訪,雖然人流多到似尖咀,但得這幾天才有市集行。建議早上逛市集後,可預留2-3小時行書店,晚上以鱈場蟹大餐作結。半年後落成的輕軌更會貫通台銘,到時交通更方便!

 

MLD台鋁生活廣場

【地址】高雄市前鎮區忠勤路8號MLD台鋁
【電話】+886-07-536-5388
【營業時間】10am-12mn
【交通】乘捷運至獅甲站4號出口,出站後左轉復興三路,至中華五路左轉直行至忠勤路口即達。
【網址】mld.com.tw

 

延伸閱讀:

【高雄】極速體驗!室內滑梯12秒由5樓落到地

【高雄】向著大海的風車-旗津風車公園@台灣.日和

「一卡通」教學| iPass通殺搭遍南北(上篇)@台灣日和