Viu TV 4月6號開台,未正式首播,網上的節目預告片已經話題十足。網友睇完即刻話,「好多旅遊節目啊!」。係嘅,同旅遊有關的節目,大大話話有5、6個,仲未計有出埠嘅其他實況節目。地點亦無馬虎,由長洲到歐洲甚至婆羅洲都有,大國小國咩人咩方式的旅行都一一拍咗。知你已經受夠年年都同獎門人去旅行,一於率先預覽睇下轉台有咩節目啦!

text: rita@新假期 | photo: viu TV、網上圖片

1) 旅行就是搵交嗌 《跟住矛盾去旅行》

預告片一出,林日曦VS蔣麗芸呢對矛盾組合擔盡風頭,不過暫定首播嘅竟然係長毛同曾鈺成,仲刻意安排去革命國家波蘭過聖誕,仲要參觀「抗命博物館」;其他組合包括何韻詩同高主教去「同性婚姻合法化」無耐的愛爾蘭都柏林,而且二人出發日子喺正當地同志大遊行前後;加埋教育理念大不同的Amanda Tann 同海星老師去到越南河內義教,可謂相當有摩擦力,開台時唔睇實無話題!

《跟住矛盾去旅行》
節目播放日期:
4月4日(逢星期一及二)10pm-10:30pm
暫定播放次序:波蘭、首爾、意大利、越南、愛爾蘭、 印尼

下一頁:仲有4個精選旅遊節目

2)  以物易物!明星非大晒遊!

受邀的明星二人一組,每組都用以物易物的方式換取三餐一宿,不用分文地撐過旅程。不過Eric Kwok同劉心悠二人在超過6日古巴之旅中,又同當地大學生打牌、喺小鎮Trinidad colonial沙灘同美女飲酒、打壘球。其他明星有啲又重遇故人、同當地美女影相,食地道傳統菜,其實都咪話唔開心!

《BARTER GAME價值連城》

陣容:劉心悠、Eric Kwok;任賢齊、梁漢文;林二汶、駱振偉
地點:古巴、茶馬古道、婆羅洲
節目播出日期:待定

3)  三更窮五更富 歐洲小國遊

為咗打破港人對快樂、消費同歐遊嘅觀念,兩位主持專揀歐洲小國,並抽籤決定窮遊定富遊。富貴主持一日有300歐使費;窮主持每日就只有10歐,要無所不用其極地賣藝、打工換宿或沙發衝浪度日,過程中同當地人交換快樂。唔知喺全球快樂指數第4(倒數)的香港,睇完個人會否開心啲呢?!

《歐遊全細界》

陣容:陳子豐、蔡雪瑩
地點:梵蒂岡、安道爾、馬爾他、列支敦士登、聖馬利諾等
節目播出日期:待定

4)  偽葡萄牙行 呃like旅遊

兩個運動型主持一齊出訪葡萄牙…前殖民地澳門,去勻葡式建築、食葡國菜同葡國人影相,用最廉價的方法影旅行呃like相。不過香港人經常出入澳門,冇返咁上下影相就角度技巧,都難啲上檔喎!

《呃like旅行團》

陣容:余曉彤(Hidy)、陳炳銓(Danny)
地點:澳門
節目播出日期:待定

5)  沙發旅行 本地離島遊

主持喺本港「沙發旅行」,由地膽帶住體驗地道美常同日常生活。雖然地點近近哋,但會大show電腦特技同後製,希望帶俾觀眾視覺享受,就咁講唔知有幾巴閉,都係拭目以待啦!

《借宿一宵》

陣容:陳俞希(Hailey)
地點:長洲、蒲台島
節目播出日期:4月11日(逢星期一)11:45pm-12:15am

延伸閱讀:
景點起底 |《海街日記》勁靚櫻花隧道……原來不在鎌倉?!
沖繩園區無望 大阪 USJ 落實開 Mario Land !!
上海迪士尼站不符預期 | 香港網民一人一句回應合輯