大埔情侶街頭MMA打架　鉸剪腳＋大風車K.O男友　譚仔三哥回應：嚇親大家添

大埔情侶街頭MMA打架　港女鉸剪腳＋360度大風車！遮遮先係真正高手？

9月26日下午，大埔發生一宗街頭打交事件，影片被街坊上傳至「香港米線關注組」。事發地點疑似位於大埔八號花園的譚仔三哥門外，正在等外賣的二人正在「耍花槍」，但事件逐步升級，男生更將女生一手抱起，豈料個女仔身手敏捷， 使出一招奪命鉸剪腳，穩定重心後再施展大風車掛頸迴旋，將男生「撻生魚」咁撻落地下！就係呢個時候紅衣譚仔遮遮從店內走出勸交，但二人情緒激動，男生仲試圖將阿姐推開，但見阿姐一手一個箍頸並勸阻， 情侶才慢慢冷靜下來。

網民： 民間隱世高手！

現場可以見到觀眾睇到「嘩嘩聲」，網民更加大感驚奇， 認為「大埔有好多隱藏高手」，現場今次是上演「週末摔角大狂熱」，認為二人既然一齊打開摔角，今次打鬧應該很快平復；有人更要求片中男主角「千祈唔好分手大哥，千祈唔好害死我哋」。 有趣的是有網民將譚仔阿姐四両撥千斤的身手比喻為電影《功夫》中的太極拳， 維肖維妙！

網民懷疑真實性！競猜：拍廣告姐！

不過亦有網民唔收貨，認為事件誇張程度媲美拍電影，更有網民表示早幾日於現場見到有人set機試拍。 有網民就由泰拳角度出發，認為大風車一招如果不是雙方有配合，很難如此順利完成， 因為對方如有絲毫掙扎女生亦不會隨即企得返起身。 更有人發現譚仔三哥最近的推廣打着「辛、椒」的旗號， 懷疑街頭打交出招乃是其中一個廣告營商策略！

譚仔三哥出面回應：預熱快閃宣傳嚇親大家添……

影片在網上洗版式瘋傳一天後，今日（9月27日）譚仔三哥米線Facebook page就發文回應事件， 指昨日黑白情侶在大埔八號花園分店門口打交兼使出鉸剪腳、撻生魚等絕技，都是為了宣傳星期四推出的新產品「黑白辛椒式」 煳椒肉骨湯米線。只不過沒有想到拍攝預熱快閃宣傳嚇親大家，「喺度講聲唔好意思」。

三哥團隊更指，今次拍攝特別起用非常專業、從事影視演出的特技人團隊參演，「佢哋都有充份綵排、做足安全措施（有眼利觀眾都留言話見到佢地戴齊護腰護膝架）！」所以大家不用太過擔心，「不論特技人員抑或姐姐都係勞苦功高，我哋一齊再次畀啲掌聲一班幕後英雄」。

網民鬆一口氣：期待廣告衝出香港！

眼見譚仔三哥出面說明真相，大批網民都湧入譚仔三哥Facebook page留言表示：「我一睇就知係拍戲架啦！」、「食完個米線混身是勁」、「點解三哥姐姐唔識打嘅？」、「賣米線都要賣埋功夫先得！諗到咁樣做宣傳真係勁呀！」、「係真係假都好，條女真係好勁，做佢男朋友真係要每日戴護腰護膝」！

即睇原片：