BigBang 粉絲 留意喇!港女每次去韓國都會順手追星,跟住偶像 MV 場景逐個起底。早前趁住去濟州工作,繼續跟住我們最愛的 BigBang 食、玩、住!最、最、最興奮的絕對是成功起底,找出他們 MV〈We like 2 Party〉之中的酒店,住埋 oppa 住過的酒店房,價錢仲要唔貴,就可瞓 GD 瞓過的床喇!啊!叔叔不行鳥!(臉紅)各位 BigBang 粉絲 、各位 VIP,跟實以下 3 個追星推介啦!(注意:下文進入瘋狂粉絲模式!)

01 | 瞓GD龍床 浸T.O.P浴缸

想當初睇住〈We like 2 Party〉的MV,見到 oppa 在酒店床捵來捵去,在私人泳池玩完又玩,已經好恨跟他們入住同一間酒店,甚至是同一間房!這次濟州追星行,終於圓夢喇!酒店是位於西歸浦的 Bayhill Pool & Villa,問過酒店職員,BigBang 入住的正正是最貴的單棟別墅 The Castle,仲一住住足 3 晚!

今次有機會入住,我覺得同中大獎冇分別!一踏入別墅,首歌已經不斷在我腦內重播!4 層樓高豪宅超過 4,300 平方呎,可以住足10個人,一眼就見到 MV 中的最重要的場景--T.O.P 的鵝蛋形大浴缸和 Big Bang 仝人赤裸裸上身(T.O.P 除外)炸水的私人泳池!

講番粉絲最關心的房價,唔好以為呢間10人豪宅有齊泳池、按摩池好離地,原來9、10月淡季入住₩1,815,000/HK$12,593起,上訂房網預訂平多一千,除開每人千零蚊,就可以瞓偶像瞓過的床,一張con飛都唔止啦!假如你咁唔識貨對BigBang冇興趣,呢度遇到韓星的機會都極高。酒店職員指,他們曾接待過少女時代、東方神起、李炳憲、朱元等等,職員仲暗示我們採訪翌日,更有重量級節目主持人前來度假,之後睇番韓娛新聞原來係劉在錫大神!飲恨擦身而過,如果我住多一日就好喇……

Bayhill Pool & Villa(베이힐)
地址:濟州道西歸浦市下猊洞1888(제주특별자치도 서귀포시 하예동 1888)
電話:+82(0)64-801-9000
房價:普通雙人房₩290,400/HK$2,063起;The Castle別墅₩1,815,000/HK$12,593起(於Agoda訂房有不少優惠,基本房最平一晚HK$428起)
網址:bayhill.co.kr

02 |  頭搖又尾擺 mark實GD專車

跟住偶像住之餘,當然唔少得玩!西歸浦的城邑樂園有騎馬、越野車體驗,走入賣票處四周都是明星照片簽名,好似連「劉大尉」宋仲基亦曾到此一遊。而我的目標當然係繼續跟住BigBang 玩卡丁車,一次玩15分鐘,唔識揸車但極大膽的我大力踩盡油門,最快可以飆到120公里!不過賽道彎位多,見有韓仔挑戰飄移卻撞到車胎牆上,最後要勞煩員工重新啟動引擎再出發。

城邑樂園(성읍랜드)
地址:濟州道西歸浦市表善面城邑里2045-1(제주도 서귀포시 표선면 성읍리 2045-1)
營業時間:9:30am-7:00pm(夏季),9:30am-5:00pm(冬季)
電話:+82(0)64-787-5324
價錢:卡丁車一人₩25,000/HK$178,二人₩40,000/HK$284
交通:在濟州市外巴士客運站搭乘表善行巴士720號至幻覺藝術博物館(트릭아트뮤지엄)下車,約40分鐘
網址:xn--hy1b45ci4m0kg.com/

03 |  終極朝聖 靚景GD café

熟韓情的,就知道隊長 G-Dragon 去年榮升老闆,在濟州島開設 Mônsant Café ! BigBang 粉絲 當然要去一去朝聖,café外牆身用上濟州標誌的建築風格,由黑色火山石堆砌而成,三側是鏡面玻璃鏡牆,被涯月邑的無敵大海包圍。天氣好的時候,海景、夕陽反射在鏡牆上,構成一道特別的「天空之鏡」。天氣好的日子,店員會把鏡牆打開,拍照反射的效果更好,店內用餐亦享受到自然的海風。G-Dragon 經常在 Ig 貼相宣傳,不時現身巡場(對上一次是 8 月),鐵粉如我就梗係留足全日,祈求GD降臨。

入到店內,打卡位是店中間地上的一塊仙人掌土坑,被餐枱圍繞卻不見突兀,更有很多人仿效偶像跟住影相。一心只是來捧偶像場,意料不到裝潢有性格之餘,連食物質素都令我很驚喜。

濟州不少 cafés供應的甜品,都是購自當地流水式的工場,反而Mônsant內所有熟食和甜品都是出自由美國受訓過的主廚之手。招牌菜雪山薄餅日賣過百份,幾乎每張枱都會柯打一客,半月形的薄餅灑上白糖霜,切開是熱辣辣粒粒分明的紅豆餡,連攝影師大哥都讚不絕口。留意熟食只供應到下午 6點 ,晚上只供應飲品。

Mônsant De Aewol(몽상 드 애월)
地址:濟州道濟州市涯月邑涯月北西街56-1(제주특별자치도 제주시 애월읍 애월북서길 56-1)
營業時間:10:00am-9:00pm
電話:+82(0)64-799-8900

交通:乘市外巴士702號或邑面循環巴士966號至漢潭洞(한담동)下車,再行7分鐘即達