撰文：CY｜圖片來源：LIHKG
女友稱約朋友去酒店Gathering 男友事後問起卻支吾以對
最近有網民於連登討論區分享經歷，表示女友約「成班女仔Friend去staycation」，事主隨口要求「send啲相嚟睇吓」，點做女友突然口啞啞、支吾以對，又責罵事主不信任她，又隨手send一張合照想過骨，卻敵不過事主金睛火眼，一眼就睇穿是舊旅行相。事主自覺戳爆女友出軌，即刻頹爆上網求意見，「唔知點面對佢好，大家覺得應唔應該分手好？」
網民見到即刻齊齊留言「帽事嘅」並加上一頂綠色帽子，似乎想單憑文字就確定事主女友已經出軌。亦有網民話應該放個Airtag入佢袋，隨時Check到對方位置，認為可以買個安心。
不過既然認定事情已經發生，就算尋找到對方位置都無補於事。有網民就話分手最實際，甚至有部分網民表示「哈，又一pair準備分手，開心」、「感建分啦（感情問題一律建議分手）」，似乎好希望事主重新成為單身一族。
事主再講自己「但係有愛意，我抽離唔到」，被網民好玄回答：「愛一個人，預失去一個人。如果你愛佢，想跟佢一齊，佢過去，現在和未來所對你的傷害，你只可以接受。」，好似相當有深度。
亦有網民話「港女偷食好平常」、「港女本性如此」、「而家呢個社會，女人偷食機會係大過男人」、「發現佢偷食，佢可以話你唔啱先，你好多問題令到佢要偷食」，對香港女性似乎觀念欠佳。
不過就算事主心灰意冷仍然好冷靜，表示「咁我諗唔係所有港女都係X女人嘅」，並不打算將錯誤怪責落所有女性身上。
不過事主所講僅憑一張旅行相及寥寥幾句對話，就認為女友已經出軌，實在未夠謹慎。事主曾提出應該攤牌對話，但其後未有進一步透露事件進展。