當你住酒店嗰時,都期望可以享受到一個舒適嘅環境同乾淨嘅設備。酒店幫住客換床單本來係好基本,但近日美國電視新聞雜誌節目《Inside Edition》就偷偷哋做咗個調查,到訪紐約曼哈頓 9 間高級酒店,結果發現其中 3 間酒店都冇喺住客退房之後更換新床單!結果震驚咗唔少人之外,令人開始反思到底 酒店房 係咪想像中咁乾淨呢?定係暗藏鮮為人知嘅事……

扮住客做手腳

節目記者首先假扮住客,入住酒店房嗰時喺床單上面用無害而又容易清潔嘅噴漆,噴咗句「我曾睡在這」嘅字句。呢種噴漆用肉眼睇唔到,只會喺紫外光下顯示出嚟。

記者留低標記退房之後,第二日會用另一個身分入住同一間房,結果發現「我曾睡在這」幾個字仍然喺床度,踢爆咗酒店冇換新床單!

唔合格嘅酒店分別係位於時代廣場附近的Candlewood Inn & Suites、Residence Inn by Marriott及位於中央公園附近的La Quinta Inn & Suites,而酒店都向住客道歉同指會關注呢件事啊!

參考網媒「Viral Scape」及英國《每日郵報》,酒店業內知情人士就透露過酒店房隱瞞住客嘅清潔問題,以下 5 樣物品其實一啲都唔乾淨,大家就要小心喇!

01 | 木製行李架

當你入到酒店房發現有行李架嗰時,記得要留意個行李架係咩材料製造!因為房間管理員極少清潔木製行李架,可以話係木虱、床蚤與臭蟲嘅溫床,如果長期將自己件行李放上去,萬一有木虱跳咗入去裡面,後果就不堪設想!

02 | 床單及毛氈

如上面個調查所見,未必每間酒店會每日幫新住客換床單,就算見到床單或者棉被上面有污跡,都可能只會用條濕毛巾擦到睇唔到。而酒店通常提供毛氈,但其實這毛氈都唔係每次清洗,如果房間溫度唔太凍,都係少用為妙!

03 | 水杯

如果你有需要用水杯,用之前記得自己洗多次。因為職員清潔房間大多數都好趕時間,所以未必會好徹底咁清洗水杯,好多時都只會抹走之前住客嘅唇印。

04 | 電視遙控器

原來職員係唔會刻意去清潔電視遙控器,甚至比水杯更加污糟!下次睇電視之前,都係搵嘢套住個遙控器好啲喇!

05 | 毛巾

肉眼見到嘅毛巾雖然白雪雪,但你永遠唔會知上手有咩人用過,同會唔會有特別用途,例如住客沖完涼之後,可能會放條毛巾喺地上,防止自己跣親!雖然酒店毛巾會進行消毒,但效果都未必有保證,所以我而家去旅行都會自己帶毛巾用!